। प्रिमियर लिगमा शनिबार राति चेल्सीले दुई पटक अग्रता लिएर पनि जोगाउन नसक्दा एभरटनसँग २-२ को बराबरी खेल्दै अंक बाँडेको छ ।
खेलमा चेल्सी जितनजिक पुगे पनि अन्तिम समयमा गोल बेहोरेपछि अंक बाँड्न बाध्य भयो ।
घरेलु मैदान स्टानफोर्ड ब्रिजमा भएको खेलको ५२औं मिनेटमा जाआओ पेलिक्सले गोल गर्दै चेल्सीलाई पहिले अग्रता दिलाएका थिए ।
तर ६९औं मिनेटमा अब्दुलाय डाकुरेले एभरटनका लागि बराबरी गोल गरे ।
७६औं मिनेटमा चेल्सीले पेनाल्टी पायो । काऐ हाभार्टले पेनाल्टीमा गोल गरेपछि चेल्सीले २-१ को अग्रता बनायो ।
जित नजिक पुगेको चेल्सीले एक मिनेट बाँकी छँदा गोल खायो । ८९औं मिनेटमा एभरटनका लागि वैकल्पिक खेलाडी एलिस रेको सिम्सले डेकुरेको पासमा गोल गरे ।
सिम्स ७९औं मिनेटमा इड्रिसा गुएको स्थानमा मैदान प्रवेश गरेका थिए । अन्तिममा गोल गर्दै एभरटनको हार टारे ।
बराबरीपछि चेल्सीले एक स्थान सुधार गरेपनि नवौँ स्थानमा उक्लेन अवसर गुमायो । २७ खेलबाट ३८ अंकसहित चेल्सी दशौं स्थानमा उक्लेको छ ।
एभरटन २८ खेलबाट २६ अंकसहित १५औं स्थानमा छ र रेलिगेसन जोनबाट २ अंकले मात्र माथि छ ।
शनिबार नै भएको अन्य खेलमा टोटनहमले दुई गोलको अग्रता कायम राख्न नसक्दा साउथह्याम्पटनसँग ३-३ को बराबरी खेलेको छ । लिड्स युनाइटेडले वल्भ्सलाई ४-२ र एस्टन भिल्लाले एएफसी बर्नमाउथलाई ३-० ले पराजित गरेको छ । लेस्टर र ब्रेन्टफोर्डले १-१ को बराबरी खेलेका छन् ।
