काठमाडौँ — नेपालले थ्री नेसन्सकपमा बुधबार लाओसलाई हराएर फाइनलको नजिक पुगेको छ । दशरथ रंगशालामा भएको खेलमा नेपाल २–० ले विजयी रह्यो ।
नेपालले अब मंगलबार भुटानको सामना गर्नेछ । त्यसअघि शनिबारको खेलमा लाओस र भुटान खेल्नेछन् । तीन टिम सहभागी प्रतियोगिताको लिग चरणको समाप्तीमा शीर्ष दुई स्थानमा रहनेले फाइनल यात्रा तय गर्नेछ ।
खेलको सबैभन्दा ठूलो विशेषता नवयुग श्रेष्ठको उत्कृष्ट गोल रह्यो । उनले ३५ यार्डबाट गरेको भलि प्रहार लाओसका गोलरक्षक जेसभाथलाई कुनै अवसर दिएर सुन्दर गोलमा परिणत भएको थियो । नेपालका लागि उनको यो व्यक्तिगत आठौं गोल हो । सन् २०२१ यता दुई वर्षको अन्तरमा उनले नेपालका लागि गोल गरेका हुन् ।
त्यस अगाडि अनन्त तामाङले ३० औं मिनेटमा नेपालका लागि गोलको खाता खोले । नवीन लामाको कर्नरमा अनमार्क रहेका अनन्तले हेडबाट गोल गरे । नेपालका लागि अनन्तको यो तेस्रो गोल हो । नेपालले लाओसलाई हराएको यो दोस्रो पल्ट हो । अहिलेसम्म नेपालले तीन पल्ट लाओसको सामना गरेकोमा एक खेल बराबरीमा टुंगेको छ ।
यस खेलबाट एपीएफका सनिस श्रेष्ठ र मणी लामा, सातदोबाटोका दीपकराज सिंह ठकुरी र मनाङ मर्स्याङ्दीका सुमित श्रेष्ठले नेपाली राष्ट्रिय टिमका लागि डेब्यु गरेका छन् । सनिस सुरुदेखि नै खेलेका थिए भने मणी, दीपकराज र सुमित दोस्रो हाफमा मैदानमा प्रवेश गरेका थिए । इटाली प्रशिषक भिन्सेन्जो अल्बर्टोको नेतृत्वमा नेपालले खेलेको यो नै पहिलो खेल हो ।
