। भेट्रान अलराउण्डर मोहम्मद नावीको उत्कृष्ट प्रदर्शनमा अफगानिस्तानले आफ्नो क्रिकेट इतिहासमै पहिलो पटक पाकिस्तानलाई पराजित गरेको छ ।
शारजाहमा शुक्रबार राति भएको पहिलो टी-२० खेलमा अफगानिस्तानले पाकिस्तानलाई ६ विकेटले हरायो ।
पाकिस्तानसँग खेल्न थालेको एक दशकपछि अफगानिस्तानले पहिलो जित निकालेको हो । पाकिस्तानले नियमित कप्तान बाबर अजामलगायत मुख्य खेलाडी आराम दिंदै शादाब खानको कप्तानीमा नयाँ खेलाडीहरुलाई अवसर दिएको थियो ।
लो स्कोरिङ म्याचमा टस जितेर पहिले ब्याटिङ गरेको पाकिस्तानले ९ विकेट गुमाएर ९२ रन मात्र बनाएको थियो ।
पाकिस्तानले दिएको ९३ रनको लक्ष्य अफगानिस्तानले १३ बल अगावै ४ विकेट गुमाउर पूरा गर्यो ।
यसै खेलमार्फत पुनरागमन गरेका ३७ वर्षीय नावीले अफगानिस्तानका लागि अविजित रहँदै ३८ रन बनाए ।
उनले पाकिस्तानका इहसानुल्लाहलाई छक्का प्रहार गर्दै जित पक्का गरेका थिए । उनले ३८ बल खेल्दै ३ चौका १ छक्का प्रहार गरे । नजिबुल्लाह जद्रान १७ रनमा अविजित रहे । रहमानुल्लाह गुर्बाजले १६ रन बनाए ।
पाकिस्तानका लागि यसै खेलबाट डेब्यु गरेका इहसानुल्लाहले ३.५ ओभरमा १७ रन खर्चेर २ तथा नसिम शाह र इमाद वासिमले समान एक/एक विकेट लिए ।
त्यसअघि अफगानिस्तानी बलरहरुले उत्कृष्ट प्रदर्शन गर्दा पाकिस्तान ९२ रनमै समेटिएको थियो ।
पाकिस्तानका इमाद वासिमले १८, सइम अयुबले १७, तयाब ताहिरले १६ र कप्तान शादब खानले १२ रन बनाए । बाँकी खेलाडीले दोहोरो अंकमा रन जोड्न सकेनन् ।
अफगानिस्तानका फजलहक फारुकी, मुजिब उर रहमान र मोहम्मद नावीले २/२ विकेट लिए । मुजिवले ४ ओभरमा ९ र फजलहकले ४ ओभरमा १३ रन मात्र खर्चिए । नावीले ३ ओभरमा १२ रन खर्चे । कप्तान राशिद खान, नविन उल हक र अजमतुल्लाह ओमरजाईले समान एक/एक विकेट लिए ।
दोस्रो टी-२० शनिबार हुनेछ ।
