एजेन्सी – कप्तान तथा फरवार्ड लियोनेल मेस्सीको ह्याट्रिक मद्दतमा अर्जेन्टिनाले अन्तर्राष्ट्रिय मैत्रीपुर्ण खेलमा सानदार फराकिलो जित दर्ता गरेको छ ।
अर्जेन्टिनाले कोन्काफको कुराकाओमाथि ७–० को फराकिलो जित दर्ता गरेको हो । अर्जेन्टिनाको जितमा मेस्सीले ह्याट्रिक पूरा गर्दा निकोलस गोन्जालेज, एन्जो फर्नान्डेज, एन्जल डि मारिया र गोन्जालो मोन्टिएलले समान एक गोल गरे ।
पहिलो हाफमा ५ गोल गरेको अर्जेन्टिनाले दोस्रो हाफमा दुई गोल थपेको थियो । अर्जेन्टिनामा बुधबार बिहान भएको खेलमा मेस्सीले १७ मिनेटभित्रै ह्याट्रिक पूरा गरेका थिए ।
२०औं मिनेटमा पहिलो गोल गरेका मेस्सीले ३३ र ३७औं मिनेटमा गोल गर्दै ह्याट्रिक पूरा गरे । उनको यो ३७औं ह्याट्रिक हो । कुराकाओमाथिको ह्याट्रिकसँगै मेस्सी अन्तर्राष्ट्रिय फुटबलमा १ सय गोल पूरा गर्ने तेस्रो खेलाडी बनेका छन् । उनले १०२ गाेल गरेका छन् । उनीभन्दा अघि पोर्चुगलका क्रिष्टियानो रोनाल्डो (१२२) र इरानका अली दाई (१०९) गोल रहेका छन् ।
२३औं मिनेटमा निकोलस गोन्जालेजले तथा ३५औं मिनेटमा एन्जोले गोल गरेका थिए । ७८औं मिनेटमा एन्जल डि मारियाले पेनाल्टीमा गोल गर्दै अर्जेन्टिनालाई फराकिलो जिततर्फ अग्रसर गराए । ८७औं मिनेटमा गोन्जालो मोन्टिएलले गोल गर्दै अर्जेन्टिनालाई फराकिलो जित दिलाए ।
