विन्डोक : वृत्या अरविन्द र आशिफ खानको उत्कृष्ट ब्याटिङप्रेरित यूएईले आईसीसी क्रिकेट विश्वकप छनोटको प्ले अफमा नामिबियालाई २८ रनले पराजित गरेको छ।
युनाइटेड क्रिकेट क्लब मैदानमा टस हारेर ब्याटिङ थालेको यूएईले पाँच विकेट गुमाएर दुई सय ६७ रनको योगपफल तयार गरेको थियो। जवाफी ब्याटिङमा उत्रिएको नामिबियाले ४८.४ ओभरमा सबै विकेट गुमाएर दुई सय ३९ रन मात्रै बनाउन सक्यो।
नामिबियाका लागि शाउन फौचेले ६० बलमा ६ चौका र एक छक्कासहित ४७ तथा माइकल मान लिङ्गेनले ३४ रनको योगदान गरे। यस्तै, कप्तान गेर्हर्ड एरास्मसले ३०, कार्ल बिर्केन्स्टोकले ३१ र रुबेन ट्रम्पेल्मानले २८ रनबाहेक अन्य ब्याटरले उल्लेख्य प्रदर्शन गर्न सकेनन्।
यूएईका लागि जहुर खान र रोहन मुस्तफाले तीन-तीन तथा आयन अफ्जल खानले दुई विकेट लिए। त्यसअघि यूएईका लागि एक सय १८ बलको सामना गरेका अरविन्दले सात चौका र एक छक्कासहित ९३ रनको अविजित इनिङ खेले।
यस्तै, आसिफ खानले ८६ बलमा ६ चौका र पाँच छक्कासहित आउट हुनुअघि ९६ रन बनाए। कप्तान मोहम्मद वासिम २३ तथा आर्यान लाक्रा २४ रन जोडेर पभिलियन फर्केका थिए।
नामिबियाका लागि बर्नार्ड स्कोल्ज, कार्ल बिर्केन्स्टोक, पिकी या फ्रान्स र कप्तान गेर्हर्ड एरास्मसले एक–एक विकेट लिए।
सुरुआती तीनमध्ये दुई खेलमा जित निकालेको नामिबिया चौथो खेलमा पराजित हुँदा चौथो स्थानमा पुगेको छ। यूएई समान खेलबाट ६ अंक जोडेर दोस्रो स्थानमा चढेको छ। शीर्ष स्थानको अमेरिकाको पनि समान ६ अंक नै छ। एक खेल कम खेलेको क्यानडा चार अंकसहित तेस्रो स्थानमा हुँदा तीन खेलबाट दुई अंक जोडेको जर्सी पाँचौ स्थानमा छ। चार खेलमा जित तथा अंकविहीन पीएनजी पुछारमा छ। ६ टिम सहभागी प्ले अफबाट शीर्ष दुई टिमले जुन–जुलाईमा जिम्बाब्वेमा हुने विश्वकपको ग्लोबल छनोटमा स्थान बनाउने छन्।