विन्डोक : स्टेभन टेलर र आरोन जोन्सको अर्धशतकप्रेरित अमेरिकाले आईसीसी क्रिकेट विश्वकप छनोटको प्लेअफमा पपुवा न्युगिनी (पीएनजी)लाई एक सय १७ रनको फराकिलो अन्तरले पराजित गरेको छ।
वान्डरर्स क्रिेकट मैदानमा टस जितेर ब्याटिङ थालेको अमेरिकाले सात विकेट गुमाएर दुई सय ३५ रनको योगफल तयार गरेको थियो। जवाफी ब्याटिङमा उत्रिएको पीएनजीले ३४.४ ओभरमा सबै विकेट गुमाएर एक सय १८ रन मात्रै बनाउन सक्यो।
पीएनजीका लागि कप्तान आसाद भालाले ७२ बलमा तीन चौकासहित ४२ रन बनाउनुबाहेक अन्य ब्याटरले उल्लेख्य प्रदर्शन गर्न नसक्दा लगातार चौथो खेलमा पराजित हुनुपर्यो।
बलिङतर्फ अमेरिकी बलर गजानन्द सिंहले ६.५ ओभरमा १५ रन खर्चेर एक मेडनसहित सर्वाधिक चार विकेट लिए। अली खानले तीन तथा निसार्ग पटेलले दुई विकेट लिएका थिए।
त्यसअघि अमेरिकी ओपनर टेलरले एक सय ३३ बलको सामना गर्दै ६ चौका र एक छक्कासहित ८१ रनको महत्त्वपूर्ण इनिङ खेले। यस्तै, जोन्सले ७७ बलमा दुई चौका र तीन छक्कासहित ६५ रनको योगदान गरे।
पीएनजीका लागि सेमो कामेयाले १० ओभरमा ३२ रन खर्चेर दुई मेडनसहित सर्वाधिक तीन विकेट लिए। कप्तान आसाद भालाले दुई तथा रिले हेकुरेले एक विकेट लिए।
सुरआती चार खेलमा पराजित पीएनजी अंकविहीन छ। अमेरिका चार खेलबाट तीन जितसहित ६ दोस्रो स्थानमा छ। ६ टिम सहभागी प्ले अफको शीर्ष दुई टिमले जुन–जुलाईमा जिम्बाव्बेमा हुने विश्वकप छनोटमा स्थान बनाउने छन्।
त्यो छनोटमा नेपाल पनि हुनेछ। १० टिमबीच हुने छनोटबाट शीर्ष दुई टिम अक्टोबर-नोभेम्बरमा भारतमा हुने विश्वकपमा छनोट हुनेछन्।
