काठमाडौँ — सहिद स्मारक लिग ‘ए’ डिभिजनको इतिहासमै एक बहुचर्चित अनुबन्धका रूपमा मछिन्द्रले आज भुटानी फुटबलको सबैभन्दा ठूलो नाम चेन्चो ग्याल्सेनलाई औपचारिक रूपमा प्रस्तुत गर्दैछ । ग्याल्सेन भुटानी राष्ट्रिय टिमका कप्तान तथा सर्वाधिक गोलकर्ता हुन् ।
उनी 'भुटानी रोनाल्डो'का रूपमा पनि चिनिन्छन् । ग्याल्सेनले पाउने पारिश्रमकबारे अहिलेसम्म ठोस जानकारी बाहिर नआए पनि उनी नेपाली क्लबले अनुबन्ध गरेका अहिलेसम्मकै सबैभन्दा महँगा खेलाडीमध्ये एक हुन सक्नेछन् । दुईपल्टको डिफेन्डिङ च्याम्पियन मछिन्द्र यसपल्टको लिगमा कमजोर सुरुआत गरेको छ र पाँच चरणको समाप्तिमा पाँच अंक मात्र बटुलेको छ ।
लिग तालिकाको ११ औं स्थानमा रहेको मछिन्द्रले आफ्नो आक्रमणलाई अझ मजबुत बनाउन ग्याल्सेनलाई अनुबन्ध गरेको हो । नेपाली फुटबलप्रेमीबीच पनि लोकप्रिय चेन्चोले हालै मात्र पञ्जाब एफसीबाट खेल्ने भारतको आई–लिग उपाधि जितेका थिए । त्यसै क्लबबाट नेपाली राष्ट्रिय टिमका कप्तान तथा गोलरक्षक किरण लिम्बूले पनि खेलेका थिए ।
हालै समाप्त भएको थ्री नेसन्सकप खेल्ने क्रममा उनी काठमाडौं आएका थिए । ग्याल्सेनकै नेतृत्वमा भुटानले सन् २०१९ मा काठमाडौंमा भएको १३ औं दक्षिण एसियाली फुटबलको पुरुष प्रतिस्पर्धामा फाइनलसम्मको यात्रा तय गरेको थियो । यसलाई भुटानी फुटबल इतिहासकै सबैभन्दा ठूलो उपलब्धि मानिएको छ ।