हैदरावाद — राजस्थान रोयल्सले इन्डियन प्रिमियर लिग (आईपीएल) २०२३ मा विजयी सुरुआत लिने क्रममा आइतबार सनराइज हैदरावादलाई ७२ रनले पराजित गरेको छ । जितका लागि २ सय ४ रनको लक्ष्य पाएको हैदरावादले २० ओभरमा ८ विकेट गुमाएर १ सय ३१ रनमात्र बनाउन सक्यो ।
मयन्क अग्रवालले २३ बलमा बनाएको २७ रन नै उच्च व्यक्तिगत स्कोर रह्यो । टस जितेर पहिले ब्याटिङको निर्णय गरेको राजस्थानले ५ विकेटमा २ सय ३ रन बनाएको थियो । उसका लागि माथिल्लो क्रमका तीन ब्याटरले अर्धशतक बनाए ।
यशस्वी जैसवालले ३७ बलमा ५४ तथा जस बटलरले २२ बलमा ५४ रन बनाए । खेलमा बटलर बढी आक्रामक देखिए । उनले ७ चौका र २ छक्का प्रहार गरे । यशस्वीको ब्याटबाट भने ९ चौका प्रहार भएको थियो । कप्तान सन्जु सामसनले ३२ बलमा ५५ रन बनाए ।
