काठमाडौं : जावलाखेल युथ क्लब सहिद स्मारक ‘ए’ डिभिजन लिग फुटबलको शीर्ष स्थानमा उक्लिएको छ। सातदोबाटोस्थित एन्फा कम्प्लेक्समा मंगलबार भएको खेलमा सातदोबाटो युथ क्लबलाई २–१ गोलले हराउँदै जावलाखेल शीर्ष स्थानमा उक्लिएको हो। जावलाखेलको जितमा फोडे फोफना र एनकोटो मोसाबीले एक÷ एक गोल गरेका थिए। सातदोबाटोका दीपकसिंह ठकुरीले एक गोल फर्काए।
प्रतिस्पर्धात्मक खेलको ४३औं मिनेटमा फोफनाले पेनाल्टीमार्फत गोल गर्दै जावलाखेललाई सुरुवाती अग्रता दिलाएका थिए। ५०औं मिनेटमा मोसाबीले गोल गर्दै जावलाखेलको अग्रता दोब्बर पारे। खेलको ७५औं मिनेटमा सातदोबाटोका दीपकसिंह ठकुरीले एक गोल फर्काएका थिए। त्यसपछि दुवै टोलीबाट थप गोल हुन नसकेपछि जावलाखेलले जित निकाल्न सफल भयो।
जावलाखेलको जारी लिगमा चौथो जित हो। जितसँगै जावलाखेलले ६ खेलमा १३ अंक जोडेको छ। ६ खेलमा १२ अंक जोडेको सातदोबाटो तेस्रो स्थानमा झरेको छ।
सहिद स्मारक ‘ए’ डिभिजन लिगअन्तर्गत नै मंगलबार भएको खेलमा न्युरोड टिम एनआरटी र चर्च ब्वाइज युनाइटेडले बराबरी खेल्दै अंक बाँडेका छन्। च्यासल मैदानमा मंगलबार एनआरटी र चर्च ब्वाइजले २–२ गोलको बराबरी खेल्दै अंक बाँडेका हुन्। चर्च ब्वाइजले दुई गोलको अग्रता बनाए पनि त्यसलाई जोगाउन नसक्दा अंक बाँड्न बाध्य भयो।
खेलको २०औं मिनेटमा आशिष चौधरीले गोल गर्दै चर्च ब्वाइजलाई सुरुवाती अग्रता दिलाएका थिए। ६२औं मिनेटमा कप्तान अनन्त तामाङले गोल गर्दै चर्च ब्वाइजको अग्रता दोब्बर बनाए। खेलको ७१औं मिनेटमा रोहन खड्गीले गोल गर्दै एनआरटीलाई खेलमा फर्काएका थिए। त्यसपछि खेलको इन्जुरी समयमा एनआरटीका सरोज तामाङले गोल गर्दै खेल २–२ गोलको बराबरी गरेका थिए। यस बराबरीसँगै एनआरटीले ६ खेलमा तीन अंक जोडेको छ। एनआरटी लिगको १३औं स्थानमा छ। ६ खेलमा १२ अंक जोडेको चर्च ब्वाइज दोस्रो स्थानमा उक्लिएको छ।
डबल राउन्ड रोबिनका आधारमा सञ्चालित ‘ए’ डिभिजन लिग दशरथ रंगशाला, एन्फा कम्प्लेक्स र च्यासल मैदानमा खेलाइउको छ। यस पटकको लिगमा एक सय ८२ खेल हुनेछ। लिग विजेताले ७५ लाख, दोस्रो टोलीले ५० लाख र तेस्रो हुने टोलीले २५ लाख रुपैयाँ नगद पुरस्कार पाउने छन्।
