काठमाडौं : कोफी कौडोले ८४औं मिनेटमा बराबरी गोल गरेसँगै मनाङ मर्स्याङ्दी क्लबले सहिद स्मारक लिगमा सोमबार थ्री स्टार क्लबविरुद्धको हार टारेको छ।
त्रिपुरेश्वरस्थित दशरथ रंगशालामा सन्तोष साहुखलले ७८औं मिनेटमा गोल गर्दै थ्री स्टारलाई अग्रता दिलाएका थिए। कौडोले दिएको ब्याक पासमा थ्री स्टारका लाकेन लिम्बुले खोसेपछि १८ यार्ड बक्स भित्र अन्मार्क्ड सन्तोषको खुट्टामा बल पुगेको थियो। सन्तोषले सोही बलमा उत्कृष्ट प्रहार गर्दै फार कर्नरमा फिनिस गरे।
तर, त्यसको ६ मिनेट नबित्दै विशोन गुरुङले दायाँतर्फबाट दिएको पासमा कौडोले हेडरमार्फत बराबरी गोल फर्काए। उनले बराबरी गोल फर्काएसँगै मनाङले जारी सिजन लिगमा अपराजित यात्रा कायमै राखेको छ।
त्यसअघि दिपेश गुरुङले १२औं मिनेटमा दिपेश गुरुङको क्रसमा पेनाल्टी एरिया भित्रबाट सन्तोषले गरेका प्रहार मनाङका गोलकिपर दीप कार्कीले रोकेका थिए।
यस्तै, ३९औं मिनेटमा मनाङका कौडोले प्रहार गरेको फ्रि–किक क्रसबार माथिबाट बाहिरिएको थियो। बराबरीसँगै मनाङ ६ खेलबाट १५ अंक जोडेर लिग तालिकाको शीर्ष स्थानमा छ। समान खेलबाट ११ अंक जोडेको थ्री स्टार पाँचौं स्थानमा छ।
आजै भएको खेलमा चर्च ब्वाइज युनाइटेड र एपीएफ क्लबले गोलविहीन बराबरी खेलेका थिए। यस्तै, एन्फा कम्प्लेक्समा भएको खेलमा नेपाल पुलिस क्लबले फ्रेन्ड्स क्लबलाई ३–१ गोलको नतिजामा पराजित गरेको थियो।