काठमाडौं: एसीसी मेन्स प्रिमियर कपको फाइनलमा यूएईविरुद्ध फिल्डिङ गरिरहेको नेपालले ९ ओभरमा तीन विकेट लिएको छ। नेपालका लागि करण केसीले दुई तथा सोमपाल कामीले एक विकेट लिएका छन्।
सोमपाल कामीले तेस्रो ओभरमा पहिलो विकेट दिलाएका थिए। यस्तै करणले छैटौं र नवौं ओभरमा गरी दुई विकेट लिएका छन्। कीर्तिपुरस्थित त्रिवि क्रिकेट मैदानमा ९ बजे सुरु भएको खेलका लागि कप्तान रोहित पौडेलले फिल्डिङ गर्ने निर्णय गरेका थिए।
यूएईका लागि ओपनिङमा आएका कप्तान मोहम्मद वासिम ८ बलमा ११ रन जोडेर सोमपालको बलमा ललित राजवंशीको हातबाट क्याच भए। पाँचौं ओभरको पाँचौं बलमा करणको बलमा यूएईका वृत्या अरविन्द ८ रन जोडेर आउट भए। यस्तै, ८.१ मा आर्यान लाक्रा १३ रनमा पभिलियन फर्के। उनी करणको बलमा आरिफ शेखको हातबाट क्याच भए।
यूएईले ९ ओभरमा तीन विकेट गुमाएर ३५ रन जोडेको छ।
नेपाली टिममा एक परिवर्तन भएको छ। प्रशिक्षक मोन्टी देशाइले दीपेन्द्रसिंह ऐरीको स्थानमा गुल्शन झालाई स्थान दिएका छन्। शनिबार त्रिवि क्रिकेट मैदानमा नेपाल र कुवेतबीचको सेमिफाइनल खेल नतिजाविहीन भएपछि समूह विजेता बनेको नेपाल फाइनलमा पुगेको थियो।
समूह ए मा रहेको नेपाल ३ खेलमा विजयी भएको थियो भने एक खेल वर्षाका कारण रद्द भएको थियो।
नेपाली टिम : रोहित पौडेल, आसिफ शेख, गुल्शन झा, करण केसी, सोमपाल कामी, कुशल भुर्तेल, ललित राजवंशी, भीम सार्की, सन्दीप लामिछाने, कुशल मल्ल, आरिफ शेख।
