काठमाडौं: एसीसी मेन्स प्रिमियर कपको फाइनलमा यूएईविरुद्ध फिल्डिङ गरिरहेको नेपालले पाँच विकेट लिएको छ। नेपालका लागि करण केसीले दुई तथा सोमपाल कामी, ललित राजवंशी र सन्दीप लामिछानेले एक-एक विकेट लिएका छन्।
यूएईका कप्तान मोहम्मद वासिम, आर्यान लाक्रा, वृत्या अरविन्द, रामिज सहजाद र रोहन मुस्तफा १५ भन्दा कम रनमा आउट भएका छन्।
यूएईले १३.२ ओभरमा पाँच विकेट गुमाएर ५१ रन बनाएको छ। अहिले क्रिजमा आसिफ खान र बसिल हमिद छन्।
नेपाली टिममा आज एक परिवर्तन भएको छ ।प्रशिक्षक मोन्टी देशाइले दीपेन्द्रसिंह ऐरीको स्थानमा गुल्शन झालाई स्थान दिएका छन्। शनिबार त्रिवि क्रिकेट मैदानमा नेपाल र कुवेतबीचको सेमिफाइनल खेल नतिजाविहीन भएपछि समूह विजेता बनेको नेपाल फाइनलमा पुगेको थियो।
समूह ए मा रहेको नेपाल ३ खेलमा विजयी भएको थियो भने एक खेल वर्षाका कारण रद्द भएको थियो।
नेपाली टिम : रोहित पौडेल, आसिफ शेख, गुल्शन झा, करण केसी, सोमपाल कामी, कुशल भुर्तेल, ललित राजवंशी, भीम सार्की, सन्दीप लामिछाने, कुशल मल्ल, आरिफ शेख।