लाहोर : फकहर जमानको अविजित शतकीय इनिङप्रेरित पाकिस्तानले न्युजिल्यान्डविरुद्ध जारी एकदिवसीय अन्तर्राष्ट्रिय शृंखलाको दोस्रो खेलमा सात विकेटको जित निकालेको छ। पाकिस्तान भ्रमणमा रहेको न्युजिल्यान्डले रावलपिन्डीमा टस हारेर ब्याटिङको निम्तो पाएको थियो।
पाँच विकेट गुमाएर न्युजिल्यान्डले तीन सय ३६ रनको योगफल तयार गरेको थियो। जवाफी ब्याटिङमा उत्रिएको पाकिस्तानले तीन विकेट गुमाएर ४८.२ ओभरमा लक्ष्य पूरा गर्यो।
पाकिस्तानका लागि जमानले एक सय ४४ बलमा १७ चौका र ६ छक्कासहित एक सय ८० रनको शानदार इनिङ खेले।
यस्तै, कप्तान बाबर आजमले ६६ बलमा पाँच चौका र एक छक्कासहित ६५ रनको अर्धशतकीय इनिङ खेलेर आउट भए। मोहम्मद रिजवान ४१ बलमा ६ चौकासहित ५४ रनको अर्धशतकीय इनिङ खेलेर अविजित रहे।
न्युजिल्यान्डका लागि म्याट हरी, हेनरी सिप्ले र इश सोधीले एक–एक विकेट लिए।
पहिलो इनिङमा न्युजिल्यान्डका लागि एक सय १९ बलको सामना गरेका डार्यल मिचेलले एक सय २९ रनको शतकीय इनिङ खेलेका थिए। यस्तै, कप्तान टम लथाम ८५ बलमा आठ चौका र एक छक्कासहित ९८ रन जोडेर आउट भए।
चाड वोयेसले ५१ रनको अर्धशतकीय इनिङ खेल्दा अन्य ब्याटरको प्रदर्शन उल्लेख्य रहेन। पाकिस्तानका लागि ह्यारिस रौफले चार तथा नशिम साहले एक विकेट लिए।
जितसँगै घरेलु टिमले एकदिवसीय शृंखलामा २–० को अग्रता बनाएको छ। तेस्रो, चौथो र पाँचौं एकदिवसीय कराँचीमा हुनेछ।
यसअघि सम्पन्न ट्वान्टी २० अन्तर्राष्ट्रिय शृंखला २–२ को बराबरीमा टङ्गिएको थियो। अन्तिम खेल असिना–पानीका कारण रद्द भएपछि शृंखला बराबरीमा सीमित बनेको थियो।
