लाहोर : एसियाली अन्तर्राष्ट्रिय क्रिकेटको सबैभन्दा ठूलो प्रतियोगिता एसिया कप आगामी सेप्टेम्बरमा पाकिस्तानमा हुने तय छ। तर, भारतले राजनीतिक कारण देखाउँदै आफ्नो टिम पाकिस्तान नपठाउने दाबी गर्दै आएको छ।
पाकिस्तानले यसअघि एसियाली क्रिकेट काउन्सिलको बैठकमा भारतले आफ्नै देशमा खेल्ने र बाँकी टिमले पाकिस्तानमा खेल्ने प्रस्ताव अघिसारेको थियो। तर, त्यसमा केही निर्णय भएको छैन।
त्यो बैठकमा पूरा प्रतियोगिता नै पाकिस्तान बाहिर सार्ने प्रस्ताव पनि उठेको पाकिस्तानी मिडियाले उल्लेख गरेका छन्। तर, त्यसलाई पाकिस्तान क्रिकेट बोर्ड (पीसीबी)ले सोझै अस्वीकार गरेको थियो।
स्रोतलाई उदृद गर्दै क्रिकेट पाकिस्तानले लेखेको छ, ‘श्रीलंका र बंगलादेशले पाकिस्तानलाई अनाधिकृत रूपमा न्युट्रल भेन्यूमा गर्ने प्रस्ताव गरेका थिए।’
श्रीलंका र यूएई दुवै एसिया कप आयोजना गर्न आत्तुर छन्। अर्कातिर भारतले एसिया कप रद्द गर्ने तयारी गरेको पनि क्रिकेट पाकिस्तानले उल्लेख गरेको छ।
भारतले यसअघि नै एसिया कप रद्द गरेर पाँच देशको प्रतियोगिता गर्न तयारी सुरु गरिसकेको समाचारमा उल्लेख छ।
नेपाल पनि एसिया कप खेल्ने सपनासहित एसीसी मेन्स प्रिमियर कप खेलिरहेको छ। आज कीर्तिपुरमा जारी यूएईविरुद्धको फाइनलमा जित निकाले नेपालले एसिया कपमा स्थान बनाउने निश्चित छ।
तर, वर्षाका कारण २८औं ओभरमा रोकिएको खेल फेरि सुरु हुन सकेको छैन। तर, यो एसिया कप नै रद्द भए नेपालको सपना पूरा हुने छैन।