काठमाडौं । शहीद स्मारक ए डिभिजन लिगमा मंगलबार नेपाल पुलिस क्लबले शीर्ष स्थानको जावलाखेल युथ क्लबलाई २-१ ले पराजित गरेको छ ।
एन्फा कम्प्लेक्स सातदोबाटोमा पुलिसको जितमा दुवै गोल विदेशी खेलाडीले गरे । चौथो जितपछि पुलिसले रेलिगेसन जोन छाडेको छ ।
पुलिसको जितमा मोसेस ट्वाम र अहमद हिजाजीले गोल गरे । जावलाखेलका विपिन कँडेलले एक गोल फर्काए ।
खेलको ३५ औं मिनेटमा मोसेसले गोल गर्दै पुलिसलाई अग्रता दिलाएका थिए ।
अघिल्लो खेलमा दुई गोल गरेका हिजाजीले ८८ औं मिनेटमा गोल गर्दै पुलिसको अग्रता दोब्बर पारे ।
जावलाखेलका लागि ८९औं मिनेटमा विपिनले एक गोल फर्काएपनि हार टार्न पर्याप्त भएन ।
यस सिजन चौथो जितपछि पुलिस रेलिगेसन क्षत्रेबाट माथि उक्लेको छ ।
१४ खेलबाट १५ अंक जोड्दै पुलिस १०औं स्थानमा उक्लेको हो ।
पहिलो चरणमा ११ औं स्थानमा रहेको पुलिस त्यसपछि दोस्रो चरणदेखि १३औं चरणसम्म अन्तिम स्थानमा थियो ।
विदेशी खेलाडी टिममा समावेश गरेपछि पुलिसले उत्कृष्ट प्रदर्शन गर्दै आएको छ ।
विदेशी खेलाडीको आगमनपछि लिगमा पुलिसको यो लगातार तेस्रो जित हो । यसअघि पुलिसले मनाङ मर्स्याङ्दी र खुमलटार एफसीलाई हराएको थियो ।
लिग लिडर जावलाखेलले भने हारपछि अंकदूरी बढाउने अवसर गुमाएको छ ।
लिगमा चौथो हार बेहोरेको जावलाखेलको १४ खेलबाट २४ अंक छ ।
अर्को खेलमा दोस्रो स्थानको थ्री स्टारले खुमलटार एफसीसँग बराबरी खेलेपछि जावलाखेल शीर्ष स्थानमै छ ।
