लन्डन : खराब लयबाट गुज्रिरहेको चेल्सी फुटबल क्लबले ११औं खेलमा इङ्लिस प्रिमियर लिगमा शनिबार राति पहिलो जित निकालेको छ।
एएफसी बर्नमाउथको मैदान भिटालिटी स्टेडियममा भएको खेलको नवौं मिनेटमा कोनर गल्लाघरले गोल गर्दै चेल्सीलाई अग्रता दिलाएका थिए।
उनले एन्गोलो कान्टेको पासलाई हेडरमार्फत गोलमा परिणत गरेका थिए। सुरुआती १० मिनेटमै पछि परेको बर्नमाउथले २१औं मिनेटमा बराबरी गोल फर्काएको थियो।
माटियास भिनाले पेनाल्टी एरियाबाट उत्कृष्ट फिनिसिङ गर्दै घरेलु टिमका लागि बराबरी गोल गरे। निर्धारित ९० मिनेटको खेल सकिन आठ मिनेट बाँकी रहँदासम्म १–१ गोलको बराबरीमा रहेको खेलमा चेल्सीले दुई गोल थप्यो।
हाकिम जिएचले ८२औं मिनेटमा प्रहार गरेको फ्रि–किकमा बेनोइट बाडियासिलले गोल गर्दै चेल्सीलाई पुनः अग्रता दिलाएका थिए। त्यसको दुई मिनेट नबित्दै जोआओ फेलिक्सले चेल्सीका लागि तेस्रो गोल गरे।
रहिम स्टर्लिङले दिएको पासलाई फेलिक्सले उत्कृष्ट फिनिसिङ गरे। यो चेल्सीले सबै खाले प्रतियोगिताको ११औं खेलमा हासिल गरेको पहिलो जित हो। जितसँगै ३४ खेलबाट ४२ अंक जोडेको चेल्सी अंक तालिकाको ११औं स्थानमा छ।
बर्नमाउथ ३५ खेलबाट ३९ अंकसहित १४औं स्थानमा छ।