। प्रमुख प्रशिक्षक पेप ग्वार्डिओलाले म्यानचेस्टर सिटीले च्याम्पियन्स लिगको सेमिफाइनलमा रियल मड्रिडसँग बदला लिने सोचिरहेको छ भने त्यो ठूलो गल्ती हुने बताएका छन् ।
गत सिजन सेमिफाइनलको दोस्रो लेगमा ९० मिनेटको समयसम्म सिटी समग्रमा ५–३ ले अगाडि थियो । तर, रियलले अविश्वसनीय रुपमा पुनरागमन गरेको थियो ।
प्रशिक्षक ग्वार्डिओलाले आफ्नो टिमले रिम्याचको उपयोग गरी साविक विजेतालाई हराएर युरोपको सबैभन्दा ठूलो क्लब उपाधिमा लामो समयको प्रतिक्षा अन्त्य सम्भव रहेको दावी गरे ।
‘हामी यहाँ बदला लिन आइरहेका छैनौं । हामी यहाँ अवसरका लागि आएका हौं,’ सेमिफाइनल पहिलो लेगअघि ग्वार्डिओलाले भने, ‘जे भयो, त्यो विगत भइसक्यो । त्यसबारे सोच्नु ठूलो कमजोरी हुनेछ । गत सिजन हामीले जुन पाठ सिकेका थियौं त्यसलाई बदलाका रुपमा होइन अनुभवका रुपमा लिनेछौं ।’
पहिलो लेगमा इत्तेहाद रंगशालामा ४–३ को जितपछि सिटीले बर्नबेउमा खेलिएको दोस्रो लेगको ७३औं मिनेटमा रियाद मेहेरेजको गोलमार्फत अग्रता बनाएको थियो । तर, अन्तिम मिनेटतिर सब्स्ट्रिच्युड रोड्रिगोले दुई गोल गरेपछि खेलमा नाटकीय परिवर्तन भयो । समग्रमा बराबरी भएपछि खेल अतिरिक्त समयमा धलेकियो । ९५औं मिनेटमा करिम बेन्जेमाले पेनाल्टीमार्फत गोल गरेपछि रियल फाइनलमा पुग्यो ।
‘मलाई सकारात्मक वा नकारात्मक तरिकाबाट आफ्नो अनुभव भनिरहन मन पर्दैन,’ ग्वार्डिओला भन्छन्, ‘निश्चित रुपमा दुवै टिममा अहिले पनि उही प्रशिक्षक र ८० प्रतिशत उही खेलाडी छन् । तर, यो खेल पूर्णतः फरक हुनेछ ।’
३–१ को हारको एक वर्षभन्दा कम समयमा म्यानचेस्टर सिटी टिम मंगलबार यो सिजनको सेमिफाइनल पहिलो लेगका लागि मड्रिड फर्केको छ । स्पेनिस महारथी रियलले गत सिजन फाइनलमा लिभरपुललाई पराजित गरेको थियो । दोस्रो लेगका लागि रियल १७ मेमा म्यानचेस्टर जानेछ ।
‘हाम्रो लागि फरक भनेको यसपल्ट दोस्रो लेग घरेलु मैदानमा हुनेछ । यो फाइदा हो कि बेफाइदा हो मलाई थाहा छैन तर, धेरै कुरा म्यानचेस्टरको खेलबाट टुंगो लाग्नेछ,’ ग्वार्डिओलाले भने ।
म्यानचेस्टर सिटी यो सिजन च्याम्पियन्स लिग, प्रिमियर लिग र एफए कप गरी ट्रिपल उपाधि जित्न चाहन्छ । प्रिमियर लिगमा निर्णायक खेलमा आर्सनललाई हराएपछि सिटीले अग्रता लिएको छ । सिटीले एफए कप उपाधिका लागि ३ जुनमा म्यानचेस्टर युनाइटेडसँग वेम्बलीमा खेल्दैछ ।
रियलका लागि बार्सिलोनालाई पछि पारेर ला लिगाको उपाधि जित्नु लगभग असम्भव छ । कोपा डेल रेको उपाधि जितिसकेको छ । यहाँ हुँदा उसले च्याम्पियन्स लिगको उपाधिकै लागि आफ्नो पूर्ण ध्यान केन्द्रित गर्नेछ । पछिल्लो १० सिजनमा छैटौंपल्ट उपाधि जित्ने प्रयासमा हुनेछ ।
बार्सिलोनाका पूर्व प्रशिक्षक ग्वार्डिओलाले गत सिजन मड्रिडलाई माथ दिन कठिन भएको स्वीकार गरे । तर, उनका अनुसार सिटी आफ्नो सबैभन्दा ठूलो लक्ष्य हासिल गर्ने सपनामा यसपल्ट सही ट्र्याकमा छ ।
‘एकदिन हामी यो सफलता पाउनेछौं । फाइनलमा पुग्नेछौं र जित्नेछौं । हामी यो सिजन त्यसकै लागि आएका हौं,’ सन् २०२१ को सिजनमा चेल्सीसँग पराजित हुँदै उपाधि जित्न चुकेको सिटीका प्रशिक्षक ग्वार्डिओला भन्छन्, ‘यो प्रतियोगिता जित्नका लागि सर्वश्रेष्ठ टिमलाई हराउनुपर्छ र, पछिल्लो एक दशकमा रियल यो प्रतियोगिताको सर्वश्रेष्ठ टिम हो ।’
सिटीका मिडफिल्डर रोड्रिगोका अनुसार उनको टिमले पछिल्लो सिजनको हारबाट पाठ सिकेको छ । यद्यपि उनले आफ्ना प्रशिक्षकको भनाइलाई खण्डन गरी टिमका सदस्यमा बदला लिने भोक रहेको बताए ।
‘हामी १८० मिनेटसम्म शानदार प्रदर्शन गर्यौं तर, यति हुँदा पनि कहिलेकाहीँ पर्याप्त हुँदैन । तपाईंले अन्तिम पाँच मिनेटमा पराजित हुनसक्नुहुन्छ,’ स्पेनका यी मिडफिल्डरले भने, ‘निर्णायक खेलको अन्तिम पाँच मिनेट हामी सही तरिकाबाट सम्हालिन सकेनौं । हामीले यसबाट सिक्नुपर्छ ।’
सिटीका डिफेण्डर नाथान एके सोमबार आफ्नो टिमको प्रशिक्षणसत्रमा उपस्थित थिएनन् । जसले उनी मंगलबार खेल्नेमा शंका छ । २८ वर्षीय एके हालै ह्याम्स्ट्रिङ चोटबाट फर्किएका थिए । प्रिमियर लिगमा शनिबार लिड्स युनाइटेडलाई हराउँदा उनलाई दोस्रो हाफमा सब्स्टिच्युड गरिएको थियो ।
जोआओ क्यान्सेलो गत जनवरीमा लोनमा बायर्न म्युनिख गएयता नेदरल्याण्ड्सका एकेले लेफ्ट ब्याकमा शानदार प्रदर्शन गरिरहेका छन् ।
यता रियलका अनुवभी मिडफिल्डर लुका मोड्रिच चोटबाट फर्किएर सुरुवाती टिमका लागि तयार भएका छन् । २०१८ को बेलोन डी’ओर विजेता ३७ वर्षीय क्रोएसियाली भेट्रान मोड्रिच शनिबार ओसासुनासँग कोपा डेल रे फाइनलमा खेलको अन्त्यतिर मैदान प्रवेश गरेका थिए ।
‘उनी बिना समस्या खेल्न सक्ने भएका छन्,’ रियलका प्रशिक्षक कार्लो एन्सेलोटीले भने, ‘उनी मंगलबार खेल्नेछन् ।’
