काठमाडौँ — शीर्षस्थानको चर्च ब्वाइजले डिफेन्डिङ च्याम्पियन मछिन्द्रलाई बुधबार एन्फा कम्प्लेक्समा २–१ ले पराजित गर्दै सहिद स्मारक ए डिभिजन लिगमा पकड बलियो बनाएको छ ।
चर्च ब्वाइजले आठौं जितसँगै ३० अंक बनाएर १६ औं चरण समाप्तिमा स्पष्ट ३ अकको अग्रता लिएको छ । टोलीले ६ खेल बराबरीमा टुंग्याएको छ भने दुई खेल हारेको छ । मछिन्द्रले चर्च ब्वाइजलाई पराजित गर्न सकेको भए अंक बराबरी गर्ने थियो । तर, चौथो हार बेहोरेपछि मछिन्द्र २४ अंकसहित चौथो स्थानमै सीमित रह्यो । जावालखेल २७ र थ्रीस्टार २५ अंक शीर्ष तीनभित्र छन् । सातदोबाटो २३ अंकसहित पाँचौंमा छ ।
विमल घर्तीमगर, चेन्चो ग्याल्सेनलगायत प्रमुख खेलाडीलाई चोटका कारण गुमाएको मछिन्द्रका लागि चर्च ब्वाइजविरुद्धको खेल उपाधि होडमा महत्त्वपूर्ण मानिएको थियो । उक्त प्रतिस्पर्धामा अञ्जन विष्टले गोल गर्दै चर्च ब्वाइजलाई ४० औं मिनेटमा अगाडि बढाए । उनले कमल श्रेष्ठको फ्रिकिकमा हेडबाट बललाई पोस्टको दिशा दिए ।
दोस्रो हाफमा ओमोलाजा करिमले पेनाल्टीमा गोल गर्दै मछिन्द्रलाई खेलमा फर्काए । मिडफिल्डर आन्द्रेस निआलाई फ्य्रांकलिन टैलाले फाउल गरेपछि रेफ्रीले दिएको पेनाल्टी अवसरमा करिमले गोल गर्दै ६४ औं मिनेटमा १–१ को बराबरी गरेका थिए । तर, मछिन्द्रका गोलकिपर प्रदीप भण्डारीले जोगाउने प्रयासमा आफ्नै पोस्टमा बललाई गोललाइन पार गराएपछि चर्च ब्वाइजले ७१ औं मिनेटमा २–१ को अग्रता लियो । नियमित गोलकिपर विशाल श्रेष्ठ घाइते भएपछि पोस्ट सम्हाल्ने अवसर पाएका प्रदीपले कमल श्रेष्ठको प्रहार रोक्ने प्रयासमा आत्मघाती गोल गरेपछि खेल चर्च ब्वाइजको पक्षमा मोडिएको थियो ।
दशरथ रंगशालामा विभागीय डर्बीमा एपीएफले त्रिभुवन आर्मीलाई ३–० को लज्जास्पद हार चखायो । एपीएफको जितमा अर्मान्ड बेडमको गोलको खाता ४१ औं मिनेटमा खोले । उनले प्रहार गरेको बल आर्मीका गोलकिपर विकेश कुथु हुँदै जाली चुम्न पुगेको थियो । आवास लामिछानेले ५६ औं मिनेटमा लोभलाग्दो गोल गर्दै एपीएफको अग्रता दोब्बर बनाए । अर्को गोल कप्तान नवीन लामाको नाममा रह्यो । उनले अर्मान्डको पासमा विपक्षी डिफेन्स र गोलकिपरलाई छक्याउँदै ६२ औं मिनेटमा उत्कृष्ट रूपमा गोल गरेका थिए ।
