काठमाडौँ — जेठ महिनामा कर्जाको ब्याजदर घटे पनि निक्षेपको स्थिर रहने भएको छ । बिहीबार बसेको नेपाल बैंकर्स संघको बैठकले जेठमा निक्षेपको ब्याजदर स्थिर राख्ने निर्णय गरेको हो । संघको कार्यकारी समितिको बैठकले जेठमा निक्षेपको ब्याजदर नबढाउने/नघटाउने निर्णय गरे पनि अरु सदस्य बैंकहरुबाट राय लिन बाँकी छ ।
‘शुक्रबार बिहानसम्म सबै बैंकहरुको राय आइसक्छ । त्यसपछि मात्र संघले औपचारिक धारणा बनाउनेछ,’ बैंकर्स संघका अध्यक्ष सुनिल केसीले भने, ‘ब्याजदर घट्दो क्रममा रहेकाले जेठमा निक्षेपको दर घटाउने सम्भावना छैन ।’ गत वर्ष महँगो दरमा लिएको मुद्दती निक्षेपको ठूलो हिस्सा अहिले परिपक्व हुँदै छ । त्यसपछि स्वत बैंकहरुको आधार दर घट्ने र त्यसले समग्र ब्याजदरमा कमी ल्याउने भएकाले अहिले निक्षेपको दर स्थिर राख्ने सहमति भएको उनले बताए ।
हाल वाणिज्य बैंकहरुले व्यक्तिगत मुद्दती निक्षेपमा अधिकतम ९.९९ र संस्थागत मुद्दतीमा अधिकतम ७.९९ प्रतिशत ब्याजदर दिँदै आएका छन् । गत चैतमा बैंकहरुले व्यक्तिगत मुद्दतीमा ११ र संस्थागत मुद्दतीमा ९ प्रतिशत दिँदै आएका थिए ।
निक्षेपको ब्याजर स्थिर रहेपनि जेठदेखि कर्जाको ब्याजदर घट्ने छ । पछिल्ला महिनामा बैंकहरुको आधार दर घट्दो क्रममा रहेको र हरेक महिना ब्याजदर परिवर्तन गर्न पाउने राष्ट्र बैंकको नीतिगत व्यवस्थाका कारण जेठदेखि ब्याजदर थप घट्ने बैंकर बताउँछन् । जेठदेखि नयाँ कर्जाको ब्याजदर करिब १ प्रतिशत विन्दु र पुरानाको करिब ०.५ प्रतिशत विन्दुका दरले घट्ने देखिएको एक बैंकरले बताए । हाल कर्जाको औसत ब्याजदर १३.३ प्रतिशत छ । यहीं वैशाखदेखि लागू हुनेगरी बैंकहरूले निक्षेपको ब्याजदर लगभग एक प्रतिशत विन्दुका दरले घटाएका थिए ।
