— नेपाल आउन लागेका अस्ट्रेलियाका सहायक विदेशमन्त्री टिम वाट्सले दुई देशका जनताबीचको लामो सम्बन्धको उत्सव मनाउने बताएका छन् ।वाट्सले दक्षिण एसियाका मुलुकहरू बंगलादेश, भुटान, नेपाल र भारत भ्रमण गर्दै छन् । यहि अवसरमा उनले जेठ २ र ३ गते नेपालको दुईदिने औपचारिक भ्रमण गर्नेछन् ।
‘हामीले शिक्षा र हाम्रा दुई देशका जनताबीचको लामो सम्बन्धको उत्सव मनाउनेछौं । नेपाल अस्ट्रेलियाका लागि तेस्रो ठूलो अन्तर्राष्ट्रिय विद्यार्थीको स्रोतको रुपमा रहेको छ,’ भ्रमणअघि आफ्ना भनाइ राख्दै सहायक विदेशमन्त्री वाट्सले भनेका छन् । काठमाडौंस्थित अस्ट्रेलियाली दूतावासबाट प्राप्त सहायक विदेशमन्त्री वाट्सको भनाइअनुसार उनले यो भ्रमणले अस्ट्रेलिया र अन्य मुलुकहरूबीचको द्विपक्षीय सम्बन्धहरुलाई सबल बनाउने उल्लेख गरेका छन् ।
‘हामी हाम्रो समान सामरिक स्वार्थ र अस्ट्रेलियाको व्यापार र लगानीका सम्बन्धबारे छलफल गर्नेछौं । यो भ्रमणले हाम्रा द्विपक्षीय राष्ट्रहरूमा जनस्तरका सम्बन्धहरू थप मजबुत बनाउने अवसर प्रदान गर्नेछ,’ उनको भनाइ छ ।
सहायक विदेशमन्त्री वाट्स शुक्रबारबाट बंगलादेशमा हुने छैटौं हिन्द महासागर सम्मेलनमा अस्ट्रेलियाको प्रतिनिधित्व गर्दै सहभागी हुन लागेका हुन् । उक्त सम्मेलनमा नेपालबाट परराष्ट्रमन्त्री एनपी साउद जाँदै छन् ।
बंगलादेशपछि भुटान जाने वाट्स थिम्पुबाट काठमाडौंमा उत्रिने बताइएको छ । त्यसपछि उनी नयाँ दिल्ली हुँदै फर्कने कार्यक्रम तय भएको छ ।