— सन् १९९७ मा आजकै दिन (मे १२) मा रुस र चेचेन्याबीच शान्ति सम्झौता भएको थियो । रुसी राजधानी मस्कोमा भएको सम्झौतामा रुसी राष्ट्रपति बोरिस यल्त्सिन र चेचेन्याका नवनिर्वाचित राष्ट्रपति अस्लान मास्कादोभले हस्ताक्षर गरेका थिए ।
शान्ति सम्झौतासँगै दक्षिणी रुसको स्वतन्त्रताका चार दशकदेखि संघर्षरत पक्ष र मस्कोबीचको युद्ध अन्त्य भएको बताइएको थियो । सम्झौताअनुसार चेचेन्याले स्वतन्त्र राष्ट्रको दाबी गरेपछि चिढिएको मस्कोले रुसकै अंश रहेको प्रतिक्रिया दियो । यसमा दुवै पक्ष आआफ्नो अडानमा रहेपछि सम्झौता भएको दुई वर्षपछि पुनः युद्ध सुरु भएको थियो ।
१९९९ को अगष्टमा इस्लामिक लडाकुहरू रुसी सीमा उल्लंघन गर्दै दागेस्तान क्षेत्रमा घुसपैठ गरेका थिए । सेप्टेम्बरमा विभिन्न रुसी सहरका अपार्टमेन्टहरूमा बम आक्रमण गरिएको थियो । आक्रमणमा चेचेन पृथकतावादीको हात रहेको रुसले दाबी गरेको थियो ।
१९९९ को अक्टोबरमा दोस्रो चेचन युद्ध सुरु हुँदा भ्लादिमिर पुटिन प्रधानमन्त्री बनिसकेका थिए । १९९९ कै डिसेम्बर ३१ मा पुटिन राष्ट्रपति बनेपछि रुसी सेनाले चेचेन्याको राजधानी ग्रोन्जीमाथि नियन्त्रण कायम गरेको थियो । पुटिनले चेचेन्यासँगको द्वन्द्व सन् २००९ सम्म कायम राखेका थिए ।