मोन्टेभिडियो : मार्सेलो बिएल्सा उरुग्वेयन राष्ट्रिय फुटबल टिमको मुख्य प्रशिक्षक बन्न तयार भएको त्यहाँको फुटबल संघले बताएको छ। उरुग्वेयन फुटबल संघको कार्यकारी समितिका सदस्य जर्ज कासालेसलाई उद्धृत गर्दै अन्तर्राष्ट्रिय सञ्चारमाध्यमले जनाएका छन्। कासालेसले सन् २०२६ को विश्वकप सम्मका लागि बिएल्साले सम्झौतामा चाँडै हस्ताक्षर गर्ने बताएका छन्।
‘अब बाँकी भनेको हस्ताक्षर मात्रै हो,’ कासालेसले ३९ महिना लामो सम्झौताबारे जानकारी दिँदै भनेका छन्। लिड्स युनाइटेडका पूर्वप्रशिक्षक बिएल्सा केही दिनमै मोन्टेभिडियो पुग्ने पनि उनले बताएका छन्। बिएल्साको नेतृत्वमा उरुग्वेले आगामी जुनमा पहिलो खेल खेल्नेछ। उरुग्वेले निकाराग्वा र क्युबासँग मैत्रीपूर्ण खेल खेल्ने तालिका रहेको छ। यस्तै, सेप्टेम्बरमा विश्वकपको दक्षिण अमेरिका छनोट पनि सुरु हुनेछ।
‘हामीले ९० मिनेटको खेलमा मात्र सीमित हुनेगरी होइन, एक विरासत बोकेका प्रशिक्षक ल्याएका हौं,’ कासालेसले भनेका छन् । उरुग्वे गत नोभेम्बर–डिसेम्बरमा कतारमा भएको विश्वकपको समूह चरणबाटै बाहिरिएको थियो।
बिएल्सा सन् १९९८ देखि २००४ सम्म अर्जेन्टिनी टिमको प्रशिक्षक थिए। सन् २००२ को विश्वकपमा बिएल्सा नेतृत्वको अर्जेन्टिना समूह चरणबाट बाहिरिएको थियो। त्यसको दुई वर्षपछि एथेन्स ओलम्पिकमा उनकै नेतृत्वमा अर्जेन्टिनाले ओलम्पिकमा स्वर्ण पदक जितेको थियो।
उनले व्यक्तिगत कारण देखाउँदै अर्जेन्टिनी टिमको प्रशिक्षक पद त्यागेका थिए। त्यसपछि सन् २००७ देखि २०११ सम्म चिलीको टिम सम्हालेका बिएल्साले व्यावसायिक फुटबलमा इस्पान्योल, एट्लेटिको बिल्बाओ, मार्से, लियोलमा पनि प्रशिक्षण गरेका थिए। सन् २०२२ को फेबु्रअरीमा लिड्सले बर्खास्त गरेपछि बिएल्सा जागिरविहीन छन्।
