रोम : एडोवार्डो बोभको निर्णायक गोलप्रेरित रोमाले युरोपा लिगको सेमिफाइनलको पहिलो लेगमा बिहीबार राति बायर लेभरकुसेनलाई १–० को नतिजामा पराजित गरेको छ। घरेलु मैदान स्टाडियो ओलिम्पकोमा १–० को जित निकालेसँगै इटालियन क्लबले पहिलो लेगमा १–० को अग्रता बनाउन सफल भयो।
पहिलो हाफ गोलरहित बराबरीमा टङ्गिए पनि दोस्रो हाफमा गरेको एक मात्र गोल रोमालाई जित दिलाउन पर्याप्त बन्यो। बोभले ६३औं मिनेटमा पेनाल्टी एरिया भित्रबाट गरेको प्रहार गोलमा परिणत भएको थियो।
ट्यामी अब्राहमले गरेको प्रहार लेभरकुसेनका गोलकिपरले ब्लक गरेपछि आएको रिबाउन्ड बलमा बोभले सशक्त प्रहार गरेका थिए।
सामान्य अवस्थामा फर्किन नभ्याउँदा लेभरकुसेनका गोलकिपर लुकार ह्राडेकी निरीह बने।
लेभरकुसेनको मैदानमा दोस्रो लेग मे १९ मा हुनेछ। त्यो खेलमा लभेरकुसेनले कम्तिमा दुई गोलको स्पष्ट जित निकाले पुनरागमनसहित फाइनल यात्रा तय गर्नेछ। एक गोलको फरकमा जित निकाले अतिरिक्त समय/पेनाल्टी सुटआउटमा नतिजा निहीत हुनेछ।
