लन्डन : वेस्टह्याम युनाइटेडका कप्तान डेक्लान राइसले क्बल छाड्ने सम्भावना रहेको चर्चा सुरु भएसँगै म्यानचेस्टर युनाइटेडले पनि चासो देखाएको छ। वेस्टह्यामका प्रशिक्षक डेविड मोयेसले राइसले लन्डन क्लब छाड्ने सम्भावना रहेको बताएका थिए।
इङ्ल्यान्डका २४ वर्षीय मिडफिल्डर राइस आर्सनल जाने प्रवल सम्भावना रहेको अन्तर्राष्ट्रिय सञ्चारमाध्यमहरूले बताएका छन्। यद्यपि, आर्सनलका लागि वेस्टह्यामले चाहेको रकम बाधक बन्न सक्छ।
वेस्टह्यामले राइसका लागि कम्तिमा १०० मिलियन पाउन्डको माग राख्ने द गार्जियनले बताएको छ। तर, आर्सनल राइसका लागि त्यति रकम खर्चिन तयार हुनेमा विश्वस्त हुन सकिँदैन।
त्यसैको फाइदा म्यानचेस्टर युनाइटेडले उठाउन सक्छ। यद्यपि, फ्रान्क लाम्पार्डले २०२० मा पहिलो पटक चेल्सीको प्रशिक्षकको जिम्मेवारी लिएपछि राइस स्टाम्फोर्ड ब्रिज जाने चर्चा चुलिएको थियो।
तर, तत्कालीन अवस्थामा चेल्सीले सरुवा बजारमा प्रतिबन्ध भोगिरहेका थियो। प्रतिबन्ध खुल्दासम्म लाम्पार्ड बर्खास्त भइसकेपछि राइस र चेल्सीबीचको चर्चा त्यसै हराएको थियो।