टेक्सास : स्पेनिस फुटबलमा दुई चिरप्रतिद्वन्द्वी रियाल मड्रिड र बार्सिलोना आगामी सिजन सुरु हुनुअघि अमेरिकामा आमनेसामने हुने भएका छन्। प्रि–सिजनमा अमेरिका भ्रमणमा निस्कने दुई स्पेनिस महारथी मैत्रीपूर्ण खेलका लागि टेक्सासस्थित अर्लिङ्टनमा जुन २९ मा उत्रिने छन्।
युरोपेली फुटबलमा ६ क्लबबीच हुने आठ खेलको प्रि–सिजन शृंखलामा म्यानचेस्टर युनाइटेड, आर्सनल, एसी मिलान र युभेन्टस पनि समावेश हुनेछन्।
यो बार्सिलोना र रियालबीच अमेरिकामा हुने तेस्रो खेल हुनेछ। यसअघि सन् २०१७ मा मियामी गार्डेनमा आमनेसामने भएका थिए। यस्तै, गत वर्षको जुलाईमा पनि हस्टनमा मैत्रीपूर्ण खेल खेलेका थिए।
अप्रिल ६ मा भएको एल क्लासिकोमा ४–० को जित निकाल्दै रियाल मड्रिड कोपा डेल रेको फाइनलमा पुगेको थियो। यस्तै, स्पेनिस ला लिगाका दुई खेलमा बार्सिलोना र रियाल एक–एक खेलमा विजयी भएका थिए।
