। क्यानडेली गायक विकेन्ड विश्वकै सबैभन्दा लोकप्रिय संगीतकार घोषित भएका छन् । गिनिज बुक अफ वर्ल्ड रेकर्ड्सले ३३ वर्षको सांगीतिक करिअरको तथ्यांकमा विकेन्डको नजिक अन्य कुनै संगीतकर्मी पनि आउन नसक्ने जनाएको छ ।
गिनिज बुकले विकेन्डलाई उक्त उपाधि दिनुअघि सार्वजनिक गरेको प्रतिवेदनमा दुई आधार प्रस्तुत छन् । जसमा संगीत स्ट्रिमिङ प्लेटफर्म स्पटीफाइमा उनका मासिक श्रोता १११.४ मिलियन छन् भने १०० मिलियन मासिक श्रोता पुग्ने पहिलो कलाकार भएको उल्लेख छ ।
विकेन्ड अहिले माइली साइरस भन्दा लगभग ३० मिलियन मासिक श्रोता (८२.४ मिलियन) ले अगाडि छन् । शीर्ष १० मा रहेका अन्यमा शकिरा (८१.६ मिलियन), एरियाना ग्रान्डे (८०.६ मिलियन), टेलर स्विफ्ट (८०.२ मिलियन), रिहाना (७८.५ मिलियन), र एड शिरन (७७.५ मिलियन) छन् ।
वास्तविक नाम एबेल म्याक्कोनेन तेस्फे, द विकेन्डको जन्म १६ फेब्रुअरी १९९० मा क्यानडामा भएको थियो । उनले पहिलो पटक सन् २०१० मा आफ्नो मिक्सटेप रिलिजसँगै व्यापक चर्चा बटुले । डार्क, वायुमण्डलीय धड्कन महसुस गर्ने र श्रोतासँग प्रत्यक्ष जोडिएका आत्मनिरीक्षण स्वादका ती मिक्सटेपले चर्चा प्राप्त गरे । यो विशिष्ट आवाजले पछि उनलाई बलियो प्रशंसक आधार निर्माण गर्न र संगीत उद्योगमा मान्यता प्राप्त गर्न मद्दत गर्यो ।
उनले त्यसपछि धेरै सफल एल्बम रिलिज गरिसकेका छन् । जसमा स्टारब्वाय, ब्युटी बिहाइन्ड द म्याडनेस र आफ्टर आवर्स छन् । जसले सबैले आलोचनात्मक प्रशंसा र व्यावसायिक सफलता पाएका छन् । लगातार उच्च गुणस्तरको संगीत उत्पादन गर्ने उनको क्षमताले संगीत उद्योगमा उनको स्थानलाई बलियो बनाउन र वर्षौंदेखि उनको लोकप्रियता कायम राख्न मद्दत गरेको छ ।
द विकेन्डले चारवटा ग्रामी अवार्ड, बीस बिलबोर्ड म्युजिक अवार्ड र छ वटा अमेरिकन म्युजिक अवार्ड जितेका छन् । उनी एक एकेडेमी अवार्ड र प्राइमटाइम एमी अवार्डका लागि एक पटक मनोनीत पनि भएका छन् ।
