— पूर्वपाकिस्तानी प्रधानमन्त्री तथा चर्चित क्रिकेटर इमरान खानले आफ्नो पार्टी पाकिस्तान तारीक-ए-इन्साफको विरोध प्रदर्शनमा महिला आन्दोलनकारीहरूको प्रशंसा गर्दै सेयर गरेको भिडियोमा प्रयोग भएको एक प्रमुख तस्बिर एआई अर्थात् आर्टिफिसियल इन्टेलिजेन्सबाट बनाइएको पुष्टि भएको छ ।
फ्रान्स २४ नामक टीभी च्यानलले गरेको तथ्य जाँचमा सुरक्षा फौजको अगाडि उभिएकी एक महिला देखिने उक्त तस्बिर एआईको प्रयोगबाट बनाइएको र अन्य दुई भिडियो क्लिप पनि प्रदर्शनसँग सम्बन्धित नरहेको पाइएको समाचार संस्थाले जनाएको छ ।
गत शुक्रबार खानले सामाजिक सञ्जाल ट्वीटरमा सेयर गरेको उक्त भिडियो झन्डै १६ लाख पटक हेरिएको थियो । उक्त भिडियो सेयर गर्ने क्रममा उनले 'जुन उत्साहका साथ पाकिस्तानी महिलाहरू आफ्नो स्वतन्त्रता र लोकतन्त्रको पक्षमा उभिएका छन्, देशको लोकतान्त्रिक इतिहासमा यसको उच्च सम्मानका साथ स्मरण गरिनुका साथै हाम्रो सुरक्षा फौजहरूको क्रुरता र उनीहरूले महिलाहरूलाई अपमान गर्न प्रयोग गरेको निर्लज्ज बल प्रयोग पनि हामी बिर्सनेछैनौं' भन्दै महिला प्रदर्शनकारीहरूमाथि बल प्रयोग भएकोमा विरोध जनाएका थिए ।
गएको वर्ष एक अविश्वास प्रस्तावमार्फत पाकिस्तानको प्रधानमन्त्रीबाट हटाइएका भए पनि खान निरन्तर पाकिस्तानको राजनीतिको केन्द्रमा रहँदै आएका छन् । यसबीचमा उनले 'लङ मार्च' जस्ता प्रदर्शन गर्ने मात्र नभइ पञ्जाबमा भएको चुनावमा राम्रो जित निकालेपछि समयभन्दा अगावै आमनिर्वाचनको माग गर्दै निरन्तर विरोध प्रदर्शन गर्दै आएका छन् । गएको नोभेम्बरमा उनीमाथि एक यस्तै प्रदर्शनमा गोलीसमेत प्रहार भएको थियो । गत मार्चयता आतंकवाद र भ्रष्टाचार लगायतका आरोपमा खानलाई पक्राउ गर्न प्रयत्नरत पाकिस्तान सरकारले मे महिनामा भने उनलाई पक्राउ नै गरेको थियो । खानको पक्राउको विरोधमा पाकिस्तानभर हिंसा भड्किएको थियो ।
पाकिस्तानको सर्वोच्च अदालतले धरौटीमा छोड्न र फेरि पक्राउ नगर्न आदेश दिएपछि छुटेका खानका समर्थकले उनको समर्थन र पाकिस्तानी सेना र सरकारको विरोधमा प्रदर्शनहरू जारी राखेका छन् । पाकिस्तानकी सूचना तथा प्रसारणमन्त्री मरीयम औरञ्जेबले मिथ्या तस्बिरको प्रयोग गरेको भन्दै खानको आलोचना गरेकी छन् । उनले खानको भिडियोमा प्रयोग भएका अन्य तस्बिर र फुटेजहरू पनि तोडमोड गरिएको र यसले पाकिस्तानी सुरक्षा फौजको उपहास गरेको प्रतिक्रिया दिएकी छन् ।
गएको साता यस्तै अर्को घटनामा अमेरिकी रक्षा मन्त्रालय (पेन्टागन)मा विष्फोट भएको भन्दै हल्ला फिँजाइएको एक तस्बिर पनि फेक र एआई जेनेरेटेड भएको पुष्टि भएको थियो । यस्तै, मे १६ मा ड्यानिएल मार्विन नामक व्यक्तिले इलन मस्कको भविष्यकी पत्नी भन्दै रोबोटसँग अन्तरंग बनेको एआई जेनेरेटेड तस्बिरहरू पनि भाइरल भएका थिए । यति मात्र होइन, रिपब्लिकन नेशनल कंग्रेसले अमेरिकी राष्ट्रपति जो बाइडेनविरूद्ध बनाएको भिडियो विज्ञापनमा प्रयोग भएको एक तस्बिर पनि एआईको प्रयोगले बनाएको भेटिएको थियो । संसारभरका सरकार र नीतिनिर्माताहरू एआईलाई कसरी नियमन गर्ने भन्नेमा प्रयत्नरत रहेको बेला यस्ता तस्बिर र भिडियोको अत्यधिक प्रयोग सुरक्षा निकाय र राजनीतिज्ञहरूको लागि पछिल्लो टाउको दुखाइ बनेको छ ।
