। भाग्यश्री । नाम जस्तै भाग्यमानी अभिनेत्री । एउटै फिल्मबाट उनले बलिउडमा अमर छाप छाडिन् । त्यो पनि डेब्यु फिल्मबाटै । फिल्म थियो, मैने प्यार किया ।
त्यसपछि पनि उनले केही फिल्म र टेलिशृंखलामा अभिनय त गरिन् तर उनको लागि मैने प्यार किया नै काफी भयो । सुरज बाडजात्य निर्देशित यो फिल्म सार्वजनिक भएको तीन दशक नाघिसक्यो, यद्यपि यसको कम्पन अझै कायम छ । र, कायम छ भाग्यश्रीको चर्चा-परिचर्चा पनि ।
मैंने प्यार किया यस्तो फिल्म थियो, जसले बलिउडमा एकसाथ भाग्यश्री र सलमान खानको भाग्योदय गराइदियो । त्ययसयता करिअरको उचाइमा अग्लिएका सलमान आजसम्म अविछिन्न बलिउडको शीर्ष भूमिकामा छन् । तर बलिउडमा भाग्यश्रीको उपस्थिति फाट्टफुट्ट मात्र छ । पछिल्लो समय उनी सलमान स्टारर फिल्म ‘किसी का भाइ किसी की जान’मा एक झलक देखापरिन् ।
भाग्यश्री भारत महाराष्ट्रको सांगलीका मराठी शाही परिवारकी सदस्य थिइन् । उनी सांगलीका चौथो एवं अन्तिम राजा वियसिंहराजे पटवर्धन र राज्यलक्ष्मी पटवर्धनकी छोर िहुन् । भाग्यश्रीका दुई दिदीबहिनी मधुवन्ती र पूर्णिमा छन् ।
शाही घरानाको भएका कारण भाग्यश्रीलाई रंसरंगको दुनियाँमा प्रवेश गर्न त्यति सहज थिएन । उनले एक अन्तर्वार्तामा भनेकी थिइन्, ‘म महाराष्ट्रका सांगलीका रुढिवादी शाही परिवारको सदस्य हुँ । हामी तीन दिदीबहिनीमध्ये म सबैभन्दा ठूली हुँ । हाम्रो परिवारमा छोरीले एक निश्चित उमेरमा विवाह गर्नु र सन्तानको योजना बनाइसक्नुपर्ने परम्परा थियो । तर मलाई कन्भेन्ट स्कुलमा पठाइयो ।’
भाग्यश्रीले १३ वर्षकै उमेरदेखि नै साडी लगाउनु परेको कुरा पनि अन्तर्वार्तामा उल्लेख गरेकी थिइन् । आफ्नो बाल्यकाल फरक पृष्ठभूमिबाट गुज्रिएको स्मरण गर्दै भाग्यश्री भन्छिन्, ‘एक हिसाबले हाम्रो दोहोरो जिन्दगी थियो । मेरो जन्म र पालनपोषण मुम्बईमा भयो । यहाँ म र बहिनीहरु अन्य बालबच्चा जस्तै सामान्य थियौं । तर सांगलीमा मेरो पिताले निर्धारण गरेको प्रोटोकल अलग थियो । के गर्ने, के नगर्ने भन्ने स्पष्ट दायरा थियो । जब म लगभग १३ वर्षकी थिएँ र आठ कक्षामा पढ्दै थिएँ, तब मैले साडी लगाउन सुरु गरें । जुन हिसाबले हामी कपडा लगाउथ्यौं, हिंड्थ्यौं, कुराकानी गर्थ्यौं, बस्थ्यौं, अरु मान्छेसँग भेटघाट गथ्र्यौं, त्यसमा खास मर्यादा पालना गर्नुपर्ने हुन्थ्यो ।’
घरकी जेठी छोरी भएका नाताले पनि परिवारमा उनको जिम्मेवारी थपिएको थियो । आसपासका मान्छेहरुको समस्या, गुनासो सुन्ने, त्यसको छिनोफानो गर्नेजस्ता काममा आफ्ना पितासँगै उनी पनि संलग्न हुनुपथ्र्यो ।
भाग्यश्रीले सन् १९८७ मा रंगीन दुनियाँमा पाइला राखिन् । त्यसताका दूरदर्शनबाट प्रसारण हुने चर्चित धारावाहिक ‘कच्ची धूप’बाट उनको अभिनय यात्रा सुरु भयो । त्यसको दुई वर्षपछि फिल्म मैने प्यार किया फिल्ममा अनुबन्धित भइन् । सलमान खानसँगै उनको फिल्मी करिअर यही बिन्दुबाट सुरु भयो ।
यो फिल्म ब्लकबस्टर भएसँगै भाग्यश्रीको करिअर पनि उचाइमा पुग्यो । यतिबेलासम्म उनले घर गृहस्थी सुरु गरिसकेकी थिइन् । हिमालय दासानीसँग विवाह गरेपछि पनि उनले फिल्मी यात्रा जारी राखिन् । सन् १९९० मा उनका तीन फिल्म रिलिज भए, कैद मैं है बुलबुल, त्यागी र पायल । सन् १९९३ मा घर आया मेरा परदेशीमा देखा परिन् । त्यसपछि भने उनको फिल्मी यात्रा धीमा रह्यो ।
पछि उनले एक मारवाडी परिवारको सदस्यसँग घरजाम गरिन् । ५४ वर्षीया भाग्यश्री अहिले आफ्ना पति हिमालय र आफ्ना दुई सन्तानसँग गृहस्थी जीवन बिताइरहेकी छन् । फरक पृष्ठभूमिमा हुर्किएकी उनलाई सामान्य जीवनमा अभ्यस्त हुनु सजिलो थिएन । यद्यपि विवाहपछि आफूले यी सबै कुराको सन्तुलन मिलाउँदै अगाडि बढेको उनले बताएकी छन् ।
