दोलखा : दोलखाको भीमेश्वर नगरपालिका-२ सोक्ला भ्यालीमा पहिलो साहसिक पर्यटकीय खेल रक क्लाइम्बिङ महोत्सव सुरु भएको छ।
सदरमुकाम चरिकोटबाट ८ किलोमिटरको दूरीमा रहेको सोक्ला गाउँ धार्मिक एवं सांस्कृतिक रूपमा समेत महत्वपूर्ण रहेको छ।
नेपाल पर्यटन बोर्डको सहकार्यमा आयोजना भएको सोक्ला रक क्लाइम्बिङ महोत्सवका लागि माउन्टेन गाइड एसोसिएसन अफ नेपालका अध्यक्ष सञ्जीव गुरुङ, उपाध्यक्ष तथा ८ औँ पटक सगरमाथा आरोही पासाङ भोटे र महासचिव रामकाजी तिवारीको टिमले दुईवटा रुट निर्माण गरेको हो।
चार सय मिटरको उचाइमा रहेको सोक्लाको भीरमा आयोजना गरिएको रक क्लाइम्बिङको नेपाल पर्यटन बोर्डका उपाध्यक्ष चन्द्रप्रसाद रिजालले आज उद्घाटन गरे।
सोक्ला रक क्लाइम्बिङ महोत्सवमा २५/२५ मिटरको दुई वटा सिङ्गल पिचको रक रुट तयार गरिएको सोक्लाश्वरी पर्यटन विकास समाजका अध्यक्ष अर्जुन पाख्रिनले बताए।
महोत्सवले सोक्ला क्षेत्र आन्तरिक तथा बाह्य पर्यटकहरूको गन्तव्य बन्ने, सोक्ला भ्याली रक क्लाइम्बिङ हबका रुपमा विकास हुने, जिल्लाको स्काउट टिमका लागि आपतकालीन उद्धार तालिम सञ्चालनको केन्द्र बन्ने, भीमेश्वर नगरपालिकाको मात्रै नभएर जिल्लाकै साहसिक पर्यटकीय गन्तव्यका रूपमा सोक्ला गाउँको प्रवर्द्धन हुने विश्वास लिइएको आयोजकले जनाएको छ।
कुल १० लाख खर्च अनुमान गरिएको रक क्लाईम्बिङमा नेपाल प्रहरी, सशस्त्र बल, नेपाल आर्मीको टिमको समेत सहभागी रहेको थियो। सगरमाथा आरोही रक क्लाइम्बरहरूको टिम पनि सहभागी रहेका थिए।
