क्वालालम्पुर : मलेसियामा जारी टी-२० अन्तर्राष्ट्रिय महिला क्रिकेट शृङ्खलाअन्तर्गत तेस्रो खेलमा नेपालले घरेलु टोली मलेसियालाई २७ रनले पराजित गरेको छ।
मलेसियाको यूकेएम वाइएसडी ओभल क्रिकेट मैदानमा बिहीबार भएको खेलमा विजयी भएसँगै नेपाल र मलेसियाबीचको शृङ्खलामा २–१ को अग्रता बनाएको छ।
जितका लागि ११० रनको लक्ष्य पाएको मलेसियाले निर्धारित २० ओभरमा चार विकेट गुमाएर ८३ रन मात्रै बनाउन सक्यो। मलेसियाका लागि ओपनर विल्फ्रेड एनी दुराइसिङ्घमले २० रन बनाइन्। यस्तै, माहिरा इजाती इस्मालीले ५४ बलमा ६ चौकासहित सर्वाधिक ४४ रन बनाउनुबाहेक अन्य ब्याटरको प्रदर्शन उल्लेख्य थिएन।
नेपालका लागि कविता कुँवर, सीता रानामगर र इन्दु बर्माले एक-एक विकेट लिए।
टस हारेर ब्याटिङ थालेको नेपालका लागि कप्तान रूबिना क्षेत्रीले १५ बलमा तीन चौका र एक छक्कासहित सर्वाधिक २७ रनको इनिङ खेलेकी थिइन्। यस्तै, ज्योति पाण्डे २३, इन्दु बर्मा २० रन बनाएर पभिलियन फर्केका थिए।
मलेसियाका लागि बलिङतर्फ निक नुरले दुई तथा असिया एलिसा र एनी दुराइसिङ्घमले एक-एक विकेट लिएका थिए।
जितसँगै नेपालले शृंखलामा २-१ को अग्रता बनाएको छ। पहिलो टी-२० मा पराजित नेपालले त्यसपछि लगातार दुई खेल जितेको छ। मलेसिया भ्रमणमा रहेको नेपालले पाँच खेल खेल्ने छ।
