पेरिस: स्ट्रोम हन्टरलाई २–१ सेटको नतिजामा पराजित गर्दै युक्रेनी टेनिस स्टार एलिन स्भितोलिना फ्रेन्च ओपनको तेस्रो चरणमा प्रवेश गरेकी छन्।
बुधबार भएको दोस्रो चरणमा हन्टरविरुद्धको पहिलो सेट २–६ ले गुमाए पनि त्यसपछि लगातार दुई सेट जित्दै स्भितोलिना लगातार आठौं पटक वर्षको दोस्रो ग्रान्ड स्लामको तेस्रो चरणमा पुगेकी हुन्।
दोस्रो सेटमा ६–३ र तेस्रो सेटमा ६–१ को जितसहित स्भितोलिनाले तेस्रो चरणमा क्यारोलिन गर्सिया र एना ब्लिनकोभाबीचको विजेतासँग भेट निश्चित गरेकी हुन्।
यस्तै, अर्को खेलमा पेटोन स्टर्न्ससँग २–१ सेटको नतिजामा पराजित हुँदै जेलेना ओस्टापेन्को प्रतियोगिताबाट बाहिरिएकी छन्।
पहिलो सेट ६–३ ले गुमाएकी ओस्टापेन्कोले दोस्रो सेटमा १–६ को जित निकालेकी थिइन्। यद्यपि, निर्णायक तेस्रो सेटमा स्टर्न्सले ६–२ को जितसँगै तेस्रो चरणमा स्थान बनाइन्।
