काठमाडौँ — ११ औं एनएसए कप पौडी प्रतियोगितामा दोस्रो दिन सोमबार थप चार कीर्तिमान कायम भएका छन् ।
सातदोबाटोस्थित अन्तर्राष्ट्रिय पौडी पोखरीमा एलेक्जेन्डर शाहले ५० मिटर र १०० मिटर फ्रिस्टायलमा दुई कीर्तिमान कायम गरे । ५० मिटरमा एलेक्सले बिहान हिट चरणमा आफ्नै नामको २४.९७ सेकेन्डमा सुधार गर्दै २४.१२ सेकेन्ड कायम गरे । उनले फाइनलमा पुनः त्यसमा सुधार गर्दै २३.९७ सेकेन्डको नयाँ कीर्तिमान कायम गरेका हुन् । ५० मिटरमा एलेक्सले यही पौडीको नवौं संस्करण २०१९ मा उक्त कीर्तिमान कायम गरेका थिए । १०० मिटर फ्रिस्टायलमा एलेक्सले आफ्नै नामको ५३.४१ सेकेन्डमा सुधार गर्दै ५२.९६ सेकेन्डका साथ कीर्तिमान कायम गरे ।
१०० मिटर ब्रेस्ट स्ट्रोकमा विकास कुमालले शुभम श्रेष्ठको नाममा रहेको १ मिनेट १०.५९ सेकेन्डलाई तोड्दै १ मिनेट १०.१४ सेकेन्ड समयको कीर्तिमान आफ्नो नाममा लेखाए । विकासले आइतबार पनि दुई कीर्तिमान कायम गरेका थिए । शुभमले एनएसए कपको नवौं संस्करणमा उक्त कीर्तिमान बनाएका थिए ।
अर्को कीर्तिमान ४०० मिटर फ्रिस्टाइलमा नाजिर हुसेनको नाममा रह्यो । आफ्नै नामको ४ मिनेट १२.२३ सेकेन्ड समयमा सुधार गर्दै ४ मिनेट १२.१७ सेकेन्डको नयाँ कीर्तिमान कायम गरे । यस इभेन्टमा अतरभ सिंह र सुनीलकुमार थापा मगर दोस्रा र तेस्रा भए । प्रतियोगितामा यू–१० उमेरसमूहतर्फ पुरुषमा मायोन श्रेष्ठ र महिलातर्फ सिसोमबुम राई, ११–१२ तर्फ कल्किन श्रेष्ठ र रोयल प्रजापति, १३–१४ तर्फ अजलकाजी ताम्राकार र मेगन गुरुङ, १५–१७ तर्फ अल्भिन महर्जन र रोशा न्यौपाने उत्कृष्ट खेलाडी भए । खुलातर्फ एलेक्जेन्डर शाह र महिलातर्फ गौरिका सिंह र डुवाना लामा संयुक्त रूपमा उत्कृष्ट खेलाडी घोषित भए । गौरिका र डुवानाको समान अंक भएपछि दुवैलाई उत्कृष्ट घोषित गरिएको थियो ।
प्रतियोगितामा निसर्ग बाटिका स्कुल १२३ अंककसाथ विजेता भयो । दोस्रो स्थानको स्वस्तीश्री गुरुकुल ९८ अंक र तेस्रो स्थानको लिंकन ५४ अंक बटुलेका थिए । उमेर समूहका उत्कृष्ट खेलाडीले ३ हजार र खुलातर्फका खेलाडीले १० हजार रुपैयाँ प्राप्त गरे । कीर्तिमान बनाएका खेलाडीले प्रत्येक कीर्तिमानवापत ५ हजार रुपैयाँ पाएका थिए ।
नेपाल पौडी संघले एसियाली खेलकुद र विश्व पौडी च्याम्पियनसिपलाई मध्यनजर गर्दै खेलाडी छनोटका लागि एनएसए कप आयोजना गरेको हो ।
