काठमाडौँ — दूरसञ्चार सेवा प्रदायक नेपाल टेलिकमले आफ्ना ग्राहकको गोपनीयतालाई लिएर कम्पनी सचेत र संवेदनशील रहेको बताएको छ । गोपनीयताको सम्मान, यसको सुरक्षा गर्न प्रतिबद्ध रहेको टेलिकमले जनाएको छ । 'गोपनीयतामा एकरत्ति पनि सम्झौता हुन नदिनेप्रति सबै ग्राहक महानुभावहरुलाई आश्वस्त हुन अनुरोध गर्दछौं,' कम्पनीले मंगलबार जारी गरेको विज्ञप्तिमा भनिएको छ ।
राज्यका अधिकारप्राप्त निकायबाट हुने कुनै अनुसन्धानको प्रक्रियामा प्रचलित कानुनबमोजिम अदालतको आदेशपछि मात्र अन्य दूरसञ्चार सेवाप्रदायकहरूलेझैं कम्पनीले विवरणहरू उपलब्ध गराउने गरेको टेलिकमले प्रष्ट पारेको छ । 'कम्पनीका सेवाहरू अत्यन्त भरपर्दा र सुरक्षित बनाई ग्राहकको गोप्यता कायम गर्न हामी अत्यन्त संवेदनशील रहेको बेहोरा जानकारी गराउँछौं,' विज्ञप्तिमा भनिएको छ, 'कम्पनीका सेवा निर्धक्क भएर प्रयोग गर्नुहुन अनुरोध छ ।'
पछिल्लो समय कम्पनीका संस्थागत प्रयोगकर्ताहरूको संख्या उल्लेख्य रूपमा बढिरहेको टेलिकमको दाबी छ । पछिल्लो समय नेपाल टेलिकमका सेवाका सुरक्षाप्रति शंका व्यक्त गर्दै समाचार प्रकाशित भएका थिए । टेलिकमसँग देशभरका करोडौं ग्राहकका वैयक्तिक विवरणहरू संकलन छन् । नेपाल दूरसञ्चार प्राधिकरणको पछिल्लो तथ्यांकअनुसार नेपाल टेलिकमका भ्वाइस सेवा लिनेको संख्या २ करोड ८ लाख १ हजार ८८९ छ भने यसका फिक्स्ड ब्रोडब्यान्ड इन्टरनेट प्रयोगकर्ता १२ लाख ५५ हजार ९२० छन् । नेपाल टेलिकमका मोबाइल ब्रोडब्यान्ड प्रयोगकर्ताको संख्या १ करोड ३० लाख ८१ हजार ४८२ छ ।
