आम्सटरड्याम : बुधबार राति भएको सेमिफाइनलमा नेदरल्यान्ड्सलाई २–४ गोलको नतिजामा पराजित गर्दै क्रोएसिया नेसन्स लिगको फाइनलमा पुगेको छ।
नेदरल्यान्ड्सको डी क्विप रंगशालामा निर्धारित ९० मिनेटमा खेल २–२ को बराबरी थियो। त्यसैले अतिरिक्त समयमा धकेलिएको सेमिफाइनलमा दुई गोल थप्दै क्रोएसियाले फाइनल यात्रा तय गर्यो।
डोनयेल मलानले ३४ औं मिनेटमा गोल गर्दै नेदरल्यान्ड्सलाई अग्रता दिलाएका थिए। पहिलो हाफमा क्रोएसिया ०–१ ले पछि परेको थियो।
आन्द्रेज क्रमारिचले ५५ औं मिनेटमा पेनाल्टीमार्फत भ्रमणकारी टिमका लागि बराबरी गोल फर्काएका थिए। मारियो प्लासिचले ७२औं मिनेटमा गरेको गोलसँगै क्रोएसिया १–२ ले अगाडि लागेको थियो। तर, इन्जुरी समयको छैटौं मिनेटमा नोवा ल्याङ्गले गोल गर्दै नेदरल्यान्ड्सलाई बराबरीमा ल्याए।
अतिरिक्त समयको आठौं मिनेट (९८औं मिनेट)मा ब्रुनो पेट्कोभिचले गोल गर्दै क्रोएसियालाई २–३ को अग्रता दिलाए। यस्तै, ११६ औं मिनेटमा लुका मोड्रिचले पेनाल्टीमार्फत गरेको गोलसँगै क्रोएसिया फाइनलमा पुग्यो।
क्रोएसियाले बिहीबार राति हुने स्पेन र इटालीबीचको दोस्रो सेमिफाइनलको विजेतासँग जुन १९ मा फाइनल खेल्ने छ
