: अमेरिकी महिला फुटबल टिमकी कप्तान बेकी साउरबर्नले अर्को महिना अस्ट्रेलिया र न्युजिल्यान्डमा हुने विश्वकप गुमाउने भएकी छन्।
पोर्टल्यान्ड थ्रोन्सबाट व्यावसायिक फुटबल खेल्ने क्रममा खुट्टामा चोट लागेकी साउरबर्न पुरै ठीक नभइसकेकाले विश्वकप गुमाउने निश्चित भएको हो।
दुई पटक अमेरिकी टिमबाट विश्व विजेता बनेकी साउरबर्नले राष्ट्रिय टिमबाट दुई सयभन्दा धेरै खेल खेलिसकेकी छन्।
उनले सामाजिक सञ्जालमा आफूले विश्वकप गुमाउनुपर्दा अत्यन्तै पीडा भएको बताएकी छन्। साउरबर्न ३८ वर्ष पुगिसकेकाले यो सम्भवतः उनको अन्तिम विश्वकप बन्न सक्थ्यो। तर, चोटका कारण गुमाउने भएपछि त्यो मौका पनि उनले गुमाएकी छन्।
लामो समयदेखि अमेरिकी रक्षापंक्तिको महत्त्वपूर्ण सदस्य रहँदै आएकी साउरबर्नले दुई सय १६ पटक अमेरिकाको प्रतिनिधित्व गर्दा दुई पटक विश्वकप र ओलम्पिकमा स्वर्ण तथा कास्य पदक जितेकी थिइन्।
