मड्रिड: स्पेनिस फरवार्ड होसेलुलाई रियाल मड्रिडले अनुबन्ध गरेको घोषणा गरेको छ। इस्पान्योलबाट व्यावसायिक फुटबल खेल्दै आएका होसेलुलाई लोनमा भित्र्याएको र अर्को सिजन रियालबाट खेल्ने बताएको छ।
स्पेनिस महारथीले अर्को सिजनको समाप्तिमा होसेलुलाई किन्ने सहमती भएको पनि वक्तव्यमा उल्लेख गरेको छ।
होसेलु २० वर्षको उमेरमा रियाल मड्रिडको एकेडेमीमा आवद्ध भएका थिए। रियाल मड्रिडको एकेडेमी कास्टियाबाट दुई सिजन खेलेका होसलुले सन् २०११ मा सिनियर टिमबाट पनि डेब्यू गरेका थिए।
आइतबार राति मात्रै स्पेनिस टिमबाट नेसन्स लिग च्याम्पियन बनेका होसेलुलाई भोलि (मंगलबार) रियालको खेलाडीको रूपमा सार्वजनिक गर्ने क्लबले बताएको छ।
सन् २००८ देखि व्यावसायिक फुटबल खेल्न थालेका ३३ वर्षीइ होसेलुले गत होफेनहम, हानोभर, आइन्ट्राच्ट फ्रान्कफर्ट, स्टोक सिटी, न्युक्यासल युनाइटेड, एलाभेसबाट पनि खेलिसकेका छन्।
