सिड्नी: टोटनहमकी स्ट्राइकर क्याहा सिमोन चोटमुक्त भएर अर्को महिना घरेलु भूमीमा हुने विश्वकपका लागि अस्ट्रेलियाको प्रारम्भिक टिममा परेकी छन्।
गत अक्टोबरमा एन्टेरियर क्रुसिएट लिगामेन्टमा चोट लागेपछि मैदानबाहिर रहेकी ३२ वर्षीय सिमोन त्यसयता मैदानमा उत्रिएकी छैनन्।
यद्यपि, उनी सोमबार घोषित अस्ट्रेलियाको २९ सदस्यीय प्रारम्भिक टिममा परेकी छन्। आज घोषित टिममा एस्टोन भिल्लाकी पूर्व फरवार्ड एमिली गेल्निक, म्यानचेस्टर सिटीकी डिफेन्डर एलाना केनेडी र अस्ट्रेलियामै व्यावसायिक फुटबल खेल्दै आएकी छोली लोगार्जो पनि टिममा परेका छन्। यद्यपि, उनीहरूले २३ सदस्यीय टिममा स्थान बनाउन आफू पूर्णरूपमा तयार भएको सावित गर्नुपर्नेछ।
अस्ट्रेलियन प्रारम्भिक टिमले गोल्ड कोस्टमा अभ्यास गर्नेछ। त्यहाँ अभ्यास सकेर २३ सदस्यीय टिम मेलबर्न जानेछ। विश्वकपअघि अस्ट्रेलियाले फ्रान्ससँग एक अभ्यास खेल खेल्ने छ।
जुलाई २० देखि सुरु हुने विश्वकप अस्ट्रेलिया र न्युजिल्यान्डले संयुक्त रूपमा आयोजना गर्दैछन्।
सन् २०२१ मा सिटीमा आवद्ध भएकी केनेडी चोटग्रस्त हुँदा त्यसयता सात खेल मात्रै खेलेकी छन्। यस्तै लोगार्जो पनि गत जनवरीपछि घुँडाको चोटका कारण खेलेकी छैनन्।
गेल्निकले पनि कुर्चुच्चाको चोटका कारण मार्च यता मैदान उत्रिन पाएकी छैनन्।
युरोपमा व्यावसायिक फुटबल खेल्दै आएका साम खेर, एली कार्पेन्टर, काइट्लिन फुर्ड र होली म्याकनमारा पनि अस्ट्रेलियन टिममा समेटिएका छन्।
अस्ट्रेलियन टिम: म्याकेन्जी आर्नोल्ड, एली कार्पेन्टर, स्टेफ काट्ले, एलेक्स चिडाक, क्यारा कोनी क्रस, लरिसा क्रुमर, काइटलिन फुर्ड, म्यारी फोलेर, एमिली गेल्निक, कट्रिना गोरी, चार्लोट ग्रान्ट, क्लेर हन्ट, एलाना केनेडी, साम खेर, ऐवी लुइक, टेगान मिकाह, कौर्टने नेभिन, क्लेर पोल्किङ्घोर्न, हेली रासो, एमी सायेर, रेमी सिम्सेन, क्याहा सिमोन, एमिली भान एग्मोन्ड, कोर्ट्नी भाइन, क्लेल ह्विलेर, जाडा व्याहाम्यान, लिडिया विलियम्स, तामेका यालोप।
