काठमाडौं : आईसीसी एकदिवसीय विश्वकप छनोटअन्तर्गत नेपालले मंगलबार चिरप्रतिद्वन्द्वी अमेरिकाको सामना गर्दैछ। विश्वकप छनोटको समूह ‘ए’मा रहेका नेपाल र अमेरिकाले प्रतियोगितामा दोस्रो खेल खेल्न लागेका हुन्। पहिलो खेलमा दुवै टोली टेस्ट राष्ट्रसँग पराजित भएका थिए। आफ्नो पहिलो खेलमा नेपाल घरेलु टोली जिम्बावे र अमेरिका वेस्ट इन्डिजसँग पराजित भएका थिए। त्यसैले ‘सुपर सिक्स’को यात्रा जारी राख्न दुवै टोलीका लागि मंगलबारको खेल महत्वपूर्ण मानिएको छ। मंगलबारको खेलमा जित निकाल्न सके मात्र ‘सुपर सिक्स’को यात्रा केही सहज बन्न सक्नेछ।
आइतबार नेपालले घरेलु टोली जिम्बावेविरुद्ध उत्कृष्ट ब्याटिङ गरेको थियो। टस हारेर पहिले ब्याटिङ गरेको नेपालले निर्धारित ५० ओभरको खेलमा आठ विकेट गुमाएर दुई सय ९० रनको योगफल खडा गरेको थियो। नेपालका प्रारम्भिक खेलाडी कुशल भुर्तेल र आसिफ शेखले एक सय ७१ रनको कीर्तिमानी साझेदारी गरेका थिए। एकदिवसीय खेलमा नेपालले बनाएको यो अहिलेसम्मकै उच्च साझेदारी हो। त्यसैले मंगलबार अमेरिकाविरुद्ध पनि कुशल र आसिफले उत्कृष्ट सुरुवात गरेमा मात्रै नेपाललाई जित निकाल्न सहज हुनेछ।
आईसीसी एकदिवसीय विश्वकप छनोटअन्तर्गत नेपालले बिहीबार बलियो प्रतिद्वन्द्वी वेस्टइन्डिज र शनिबार नेदरल्यान्ड्सको सामना गर्नेेछ। आईसीसी विश्वकप छनोटमा १० टोलीको सहभागिता रहेको छ। सहभागी टोलीलाई दुई समूहमा विभाजन गरिएको छ। हरेक समूहका शीर्ष तीन टोलीले सुपर सिक्समा स्थान बनाउने छन्। सुपर सिक्सबाट फाइनल पुग्ने दुई टोलीले आगामी अक्टोबर ५ देखि भारतमा हुने विश्वकपमा स्थान बनाउने छन्। सातौंदेखि १०औं स्थानका टोलीले प्लेअफ खेल्ने छन्।
नेपाल र अमेरिकाले ६ पटक एकदिवसीय खेलमा प्रतिस्पर्धा गरेका छन्। यी दुई टोलीबीच ६ खेलमा भेट हुँदा नेपालले तीन र अमेरिकाले दुई खेलमा जित निकालेका छन्। एक खेल भने बराबरीमा सकिएको थियो। नेपाल र अमेरिकाले सन् २०२० मा पहिलो पटक एकदिवसीय खेलमा प्रतिस्पर्धा गरेका थिए।
सन् २०२० फेब्रुअरी ८ मा आईसीसी विश्वकप क्रिकेट लिग टुको एकदिवसीय शृंखलाको खेलमा नेपालले ३५ रनले जित निकालेको थियो। सोही शृंखलाको दोस्रो खेलमा अमेरिकालाई ३५ रनमा समेट्दै नेपालले आठ विकेटको जित निकालेको थियो। आईसीसी विश्वकप क्रिकेट लिग टुको ओमानमा सन् २०२१ मा भएको शृंखलामा नेपाल र अमेरिका तेस्रो पटक आमनेसामने भएका थिए। सो खेल नेपालले पाँच विकेटले जितेको थियो। यस्तै चौथो भेट सोही शृंखलामा भएको थियो। सो खेलमा अमेरिका ६ विकेटले विजयी भएको थियो। आईसीसी विश्वकप क्रिकेट लिग टुकै अमेरिकामा भएको शृंखलामा यी दुई राष्ट्रबीच पाँचौ भेट भएको थियो। सन् २०२२ मा भएको शृंखलाको पहिलो खेल बराबरीमा सकिएको थियो। सोही शृंखलामा दुई टोलीबीच छैटौं भेट भएको थियो। सो खेलमा अमेरिका ३९ रनले विजयी भएको थियो।
