अक्ल्यान्ड : साविक विजेता अमेरिका फिफा महिला विश्वकप फुटबलको अन्तिम १६ मा प्रवेश गरेको छ। मंगलबार भएको समूह ‘ई’ को खेलमा पोर्चुगलसँग गोलरहित बराबरी खेल्दै अमेरिका उपविजेताका रुपमा अन्तिम १६ मा पुगेको हो। यही समूहको अर्को खेलमा नेदरल्यान्ड्सले भियतनामलाई ७–० गोलले हराउँदै विजेताका रुपमा प्रिक्वार्टरफाइनलमा स्थान बनायो।
नेदरल्यान्ड्स सात अंकसहित समूहको शीर्ष स्थानमा रहँदा पछिल्ला दुई संस्करणको विजेता अमेरिका पाँच अंकका साथ दोस्रो स्थानमा रह्यो। चार अंक जोडेको पोर्चुगल तेस्रो र तीनै खेलमा पराजय बेहोरेको भियतनाम पुछारमा रह्यो।
न्युजिल्यान्डको इडेन पार्कमा भएको खेलमा अमेरिका र पोर्चुगलले थुप्रै अवसर बनाए पनि गोल भने गर्न सकेनन्। नेदरल्यान्ड्सको जितमा जिल रुड र इस्मी ब्रुस्टले दुई÷दुई गोल गरे। यस्तै, लिएकी मार्टिन्स, कार्जा स्नोइज र ड्यानियल भान डे डंकले एक÷एक गोलको योगदान दिए। गोलको वर्षा भएको खेलको आठौं मिनेटमा लिएकी मार्टिन्सले गोल गर्दै नेदरल्यान्ड्सलाई अग्रता दिलाएकी थिइन्। ११औं मिनेटमा कर्जा स्नोइसले गोल गर्दै टोलीको अग्रता दोब्बर बनाइन्। १८औं मिनेटमा इस्मीको गोलमा नेदरल्यान्ड्स ३–० ले अघि बढ्दा २३औं मिनेटमा जिल रुडले गोल गर्दै अग्रता बढाइन्। ४५औं मिनेटमा ड्यानिल, ५७औं मिनेटमा इस्मी, ६७औं मिनेटमा लिएकी र ८३औं मिनेटमा जिल रुडले गोल गर्दै नेदरल्यान्ड्सलाई सानदार जित दिलाएका थिए।
यसैगरी समूह ‘डी’बाट इङ्ल्यान्ड र डेनमार्कले प्रिक्वार्टरफाइनलमा स्थान बनाएका छन्। मंगलबार भएको खेलमा इङ्ल्यान्डले चीनलाई ६–१ र डेनमार्कले हाइटीलाई २–० गोलले पराजित गर्दै अन्तिम १६ मा स्थान बनाएका हुन्। अस्ट्रेलियाको एडिलेडमा भएको खेलमा इङ्ल्यान्डलाई जित दिलाउन लौरेन जेम्सले दुई गोल गरिन्। यस्तै एलेसिया रुसो, लौरेन हेम्प, क्लो केली र रचेल डलीले एक÷एक गोल गरे। चीनकी वाङ सुहाङले एक गोल फर्काइन्।
इङ्ल्यान्डले चौथो मिनेटमै एलेसिया रुसोको गोलबाट अग्रता लिएको थियो। २६औं मिनेटमा लौरेन हेम्पले गोल गर्दै अग्रता दोब्बर पारिन्। लौरेन जेम्सले ४१औं मिनेटमा गोल गर्दै इङ्ल्यान्डलाई ३–० को अग्रता दिलाइन्। ५७औं मिनेटमा सुहाङ वाङले पेनाल्टीमा गोल गर्दै खेललाई ३–१ को स्थितिमा ल्याएकी थिइन्। ६५औं मिनेटमा लौरेन जेम्स, ७७औं मिनेटमा क्लो केली र ८४औं मिनेटमा रचेल डलीले गोल गर्दै इङ्ल्यान्डलाई ६–१ को जित दिलाए।
