: क्यानडाका प्रधानमन्त्री जस्टिन ट्रुडो र उनकी श्रीमती सोफीबीच सम्बन्ध विच्छेद भएको छ। वैवाहिक जीवनको १८ वर्षपछि उनीहरू अलग भएका हुन्।
सन् २००५ मा विहे गरेका उनीहरूको तीन सन्तान छन्। उनीहरूले सामाजिक सञ्जालमार्फत् आफूहरू अलग भएको घोषणा गरेका हुन्। उनीहरूले एकअर्काप्रति अगाध प्रेम र सम्मान रहिरहने उल्लेखसमेत गरेका छन्।
कागजीरूपमा उनीहरू छुट्टिए पनि अझै केही समय सार्वजनिकरूपमा सँगै देखिने प्रधानमन्त्रीको सचिवालयले जानकारी दिएको छ। 'सम्बन्ध विच्छेदका लागि उनीहरूबीच कानुनी प्रक्रिया पूरा गरिसकेका छन्। औपचारिकरूपमा उनीहरू अर्को हप्तादेखि विदा हुनेछन्,' सचिवालयको विज्ञप्तिमा भनिएको छ।
ट्रुडो दम्पतीले आफ्ना सन्तानको गोपनियता कायम राख्न अनुरोध गरेका छन्। उनीहरूको दुई छोरा जेभियर र हेड्रिन र एक छोरी एला ग्रेस छन्।
उनीहरूले यसअघि नै आफूहरूबीचको सम्बन्धमा समस्या रहेको उल्लेख गरेका थिए। प्रधानमन्त्री ट्रुडोले आफ्नो आत्मकथामा पनि आफ्नो वैवाहिक जीवन पूर्ण नरहेको उल्लेख गरेका छन्। उनले आफूले कठिन उतार चढावहरूको सामना गर्नुपरेको किताबमा लेखेका छन्।
