: कोलम्बियाविरुद्ध लिग चरणको अन्तिम खेलमा १–० गोलको जित निकालेसँगै मोरक्को अस्ट्रेलिया र न्युजिल्यान्डमा जारी फिफा महिला विश्वकपको अन्तिम १६ मा पुगेको छ।
अस्ट्रेलियाको पर्थमा बिहीबार भएको समूह ‘एच’को अन्तिम चरणको खेलमा दक्षिण कोरियासँग जर्मनी १–१ गोलको बराबरीमा अल्झिएसँगै मोरक्को नक आउट चरणमा पुगेको हो।
मोरक्कोका लागि अनिसा लमारीले ४५औं मिनेटमा गरेको एक मात्र गोल जितका लागि पर्याप्त बन्यो। प्रतिस्पर्धात्मक खेलमा बाहुल्य बनाए पनि कोलम्बियाले गोल फर्काउन सकेन।
आजै भएको सोही समूहको अर्को खेलमा अंक बाँडेका दक्षिण कोरिया र जर्मनी समूह चरणबाटै बाहिरिएका छन्। सुरुआती दुई खेलबाट तीन अंक मात्रै जोडेको जर्मनी आजको बराबरीसहित तेस्रो स्थानमा सीमित रह्यो। यस्तै, दुई खेलमा पराजित दक्षिण कोरियाले समूह चरणमा एक अंक मात्रै जोड्न सक्यो।
समूह चरणका खेल सकिएसँगै अन्तिम १६ मा पुगेका सबै टिमको टुङ्गो लागेको छ। समूह एबाट स्वीट्जरल्यान्ड र नर्वे अर्को चरणमा पुग्दा अस्ट्रेलिया र नाइजेरियाले समूह बीबाट स्थान बनाएका छन्।
समूह सीबाट स्पेन र जापान तथा समूह डीबाट इङ्ल्यान्ड र डेनमार्कले पनि प्रि–क्वार्टरफाइनल यात्रा तय गरे। समूह ईबाट नेदरल्यान्ड्स र साविक विजेता अमेरिका, एफबाट फ्रान्स र जमैका तथा जीबाट स्वीडेन र दक्षिण अफ्रिकाले नकआउटमा स्थान बनाए।
नक आउट चरण अगस्ट ५ देखि सुरु हुनेछ। जुलाई २० मा न्युजिल्यान्डमा उद्घाटन भएको विश्वकपको समापन तथा फाइनल अगस्ट २० मा अस्ट्रेलियाको सिड्नीमा हुनेछ।
