— मिडल्यान्ड वारियर्सले दोस्रो ब्रिटिस नेप्लिज प्रिमियर लिग (बिएनपीएल) क्रिकेट प्रतियोगिता जितेको छ । लन्डन साउथलस्थित ‘लन्डन टाईगर स्पोर्ट भेन्यू’ मा आयोजित प्रतियोगिता विजेता मिडल्यान्डले २५ सय ५० पाउन्डसहित सिल्ड जितेको हो ।
यो पुरस्कार बेलायतको नेपाली समुदायमा सबैभन्दा बढी हो । प्रतियोगितामा गोर्खा क्रिकेट क्लब उपविजेता भयो । टिमले एक हजार पाउन्ड र ट्रफी जितेको छ ।
विजयी खेलाडीलाई इलिङ तथा साउथहल सांसद वीरेन्द्र शर्मा, लन्डनस्थित नेपाली दूतावासकी नियोग उपप्रमुख रोशन खनाल र नेपाली क्रिकेट टोलीका पूर्वकप्तान ज्ञानेन्द्र मल्लले पुरस्कार तथा प्रमाणपत्र प्रदान गरे । विजेताको पुरस्कार द रवि फाउन्डेशनका संस्थापक रवीन्द्रजंग लामिछाने र उपविजेता पुरस्कार प्रायोजक माया सपोर्टेड लिभिङकी सत्या विष्टले हस्तान्तरण गरे ।
प्रतियोगितामा खुकुरी क्रिकेट क्लब, एडिनबरा फायरबल, लन्डन सुपर स्पोर्टस, नयाँ युवा क्रिकेट क्लब, गोर्खा क्रिकेट क्लब र मिडल्यान्ड वारियर्स गरी ६ टिमले प्रतिस्पर्धा गरेका थिए । सुपर एट (८ ओभर) संरचनाको खेलमा प्रति टिम ८ खेलाडी थिए ।
खेलमा प्रमुख आकर्षणमा राष्ट्रिय टोलीका पूर्वकप्तान ज्ञानेन्द्र मल्ल रहे । प्रतियोगिताकै लागि उनी विशेष अतिथिका रूपमा लन्डन आएका हुन् । अन्तर्राष्ट्रिय खेलजीवनबाट संन्यास लिएको भोलिपल्ट लन्डन आइपुगेका ज्ञानेन्द्र विन्दास देखिन्थे ।
लिगका मुख्य आयोजक केटीएम ट्राभल एन्ड टुर्सका अपरेसन डाइरेक्टर सुनील थापाले प्रतियोगिता सफल बनाउन सहयोग गर्नेप्रति आभार जनाए ।
