— केही महिनाभित्रै दोस्रो पटक पक्राउ परेका पाकिस्तानका पूर्वप्रधानमन्त्री तथा तेहरिक–ए–इन्साफ (पीटीआई) पार्टीका प्रमुख इमरान खान भ्रष्टाचार मुद्दामा तीन वर्ष कैद पाएपछि जेलमा छन् । सरकारमा हुँदा उपहार बिक्री गर्दा पाएको रकमबारे जानकारी नगराएको ‘तोषाखाना मामिला’मा उनलाई इस्लामाबाद जिल्ला अदालतले कैद सजाय र जरिवानाको फैसला सुनाएको हो ।
खानलाई यसअघि गत मे ९ मा पनि अर्कै भ्रष्टाचार मुद्दामा पक्राउ गरिएको थियो । त्यतिबेला पाकिस्तानी सरकार र सेनाविरुद्ध देशभर प्रदर्शन भएको थियो । पाकिस्तानी सेनाको मुख्यालयसहित विभिन्न ठाउँमा खानका कार्यकर्ताले आक्रमण गरेका थिए । सरकारलाई प्रदर्शन रोक्न हम्मेहम्मे परेको थियो । केही दिनमै अदालतको आदेशपछि खान रिहा भएका थिए । गत शनिबार लाहोरस्थित निवासबाट दोस्रो पटक पक्राउ पर्नुअघि उनले आफ्नो पक्राउको विषयमा चुप नबस्न सर्वसाधारणलाई अपिल गर्दै भिडियो सन्देश सार्वजनिक गरेका थिए । ‘तपाईं चुप बस्नु हुँदैन । आफ्नो हक नमिलेसम्म लड्नुपर्छ र मतको माध्यमबाट यो लडाइँ गर्नुपर्छ,’ उनले भनेका थिए ।
तर, यस पटक खान पक्राउ परेपछिको पाकिस्तानको माहोल फरक छ । अघिल्लो पटक सडक प्रदर्शन, भवनमा तोडफोड र आगलागीका कारण प्रदर्शन रोक्न सेना सडकमा आउनुपरेको थियो । तर, यस पटक त्यस्तो अवस्था छैन । यो अवस्थाबाट सर्वसाधारणले खानलाई अनुशरण गर्न नचाहेको पुष्टि हुने पाकिस्तानी सरकारका मन्त्रीहरूको भनाइ छ । तर, अघिल्लो पटकको प्रदर्शनबाट सरकारले सुरक्षा व्यवस्था कडा पारेपछि खान समर्थक डराएको बीबीसीले उल्लेख गरेको छ । अर्कोतर्फ खानको सजायबारे माथिल्ला अदालतबाट पनि यही फैसला सदर भएमा उनी आगामी ५ वर्षका लागि चुनाव लड्न अयोग्य साबित हुनेछन् । त्यसो भएमा खानको राजनीतिक भविष्य अन्त्यको संघारमा पुगेको एकथरी विश्लेषकहरूको भनाइ छ ।
यद्यपि, कुनै समय पाकिस्तानको क्रिकेट टिमका कप्तानसमेत रहेका ७० वर्षीय खान उत्तिकै लोकप्रिय पनि छन् । सन् १९९६ मा पीटीआई स्थापना गरेर उनी राजनीतिमा प्रवेश गरेका थिए । पीटीआईले सन् २०१८ मा ११६ सिट जितेपछि खान प्रधानमन्त्री बनेका थिए । तर, सन् २०२२ अप्रिलमा अविश्वास प्रस्तावमा हारपछि उनले सत्ता गुमाउनुपरेको थियो । यसको कारण मानिएको थियो, पाकिस्तानी सेना तथा
गुप्तचर निकायसँग उनको बिग्रँदो सम्बन्ध । त्यसयता खानले पनि पाकिस्तानी सेनाको कडा आलोचना गर्दै आएका थिए ।
प्रधानमन्त्रीबाट हटेपछि खानविरुद्ध एक सयभन्दा बढी मुद्दा दायर भएका छन् । तर, उनी विभिन्न अदालतबाट अस्थायी राहत पाउन सफल भइरहेका छन् । यसअघि पक्राउ परेर छुटेका खानलाई यसपालि पनि रिहा गर्न उनका वकिलहरूले माथिल्लो अदालतमा पुनरावेदन दायर गरिसकेका छन् । खानमाथि राजनीतिक प्रतिशोध साधिएको उनका वकिलहरूको भनाइ छ ।
खानअघि पनि पाकिस्तानका प्रमुख नेताहरू जेल परिसकेका छन् । हालका प्रधानमन्त्री नवाज शरिफ, बेनिजिर भुट्टो, सैन्य शासक परवेज मुसर्रफलगायत पछिल्लो दशकमा पक्राउ परेका नेताहरू हुन् । त्यसकारण खान पछि फेरि राजनीतिक केन्द्रमा आउन सक्ने केही विश्लेषकको भनाइ छ । तर, पाकिस्तानी सरकारले यसअघि खानलाई पक्राउ गरेका पीटीआईका नेता तथा कार्यकर्तामाथि पनि धरपकड सुरु गरेको थियो । त्यसकारण थुप्रै वरिष्ठ नेताले खानको पार्टी छोडेका थिए । पाकिस्तान सरकारले खानका सयौं कार्यकर्तालाई पक्राउ तथा उनीहरूलाई विभिन्न कसुर लगाएर थुनामा पठाएको थियो । त्यसैले खानको राजनीतिक पुनरागमन सहज नहुने विश्लेषकहरूले जनाएका छन् ।
