— मछिन्द्रले १ गोलले पछाडि रहेको स्थिति उल्टाएर मंगलबार एएफपी कप २०२३ को प्रारम्भिक चरणमा भुटानको पारो एएफसीलाई ३-२ ले पराजित गरेको छ ।
दशरथ रंगशालामा भएको खेलमा मछिन्द्रले पहिलो हाफमा मीठो खेल पस्केको थियो । अब प्रारम्भिक दोस्रो चरणमा मछिन्द्रले भारतको आईएसएल क्लब मोहन बगानको सामना गर्नेछ ।
भुटानको लिग च्याम्पियन पारोले सातौं मिनेटमा अग्रता लिएको थियो । काजु होमाले मछिन्द्रका गोलरक्षक विशाल श्रेष्ठको कमजोरीमा गोल गरे । उसको बढ्त लामो समय भने टिकेन ।
विमल घर्तीमगरले हेडबाट १२ औं मिनेटमा बराबरी गोल फर्काए । आयुश घलानले बिमलकै पासमा सजिलै दोस्रो गोल गरे । ओलावाले अफिजले ३८ औं मिनेटमा उत्कृष्ट तेस्रो गोल गरे । पारोका लागि इभान्स एसान्टेले ७० औं मिनेटमा दोस्रो गोल फर्काए । यससँगै पारोले कडा दबाब सिर्जना गरेको थियो ।
मछिन्द्रले सहिद स्मारक लिग ए डिभिजनको दोस्रो स्थानमा रहेर एसियाली क्लबको यो प्रतियोगिता खेल्ने अवसर पाएको हो ।
