काठमाडौं : राष्ट्रिय खेलकुद परिषद्ले नवौं राष्ट्रिय खेलकुद २०७९ को खर्च विवरण सार्वजनिक गरेको छ।
बुधबार काठमाडौंमा पत्रकार सम्मेलन गर्दै राखेपले गण्डकी प्रदेशमा गत असोज २८ देखि कार्तिक ३ गतेसम्म आयोजना गरेको नवौं राष्ट्रिय खेलकुदको खर्च विवरण सार्वजनिक गरेको हो।
प्रतियोगितामा ५३ करोड ७९ लाख खर्च भएको राखेपले जनाएको छ। प्रतियोगिता सम्पन्न गर्न नेपाल सरकारबाट ६० करोड १० लाख र आन्तरिक आम्दानी ५१ लाख ५२ हजार सात सय गरी कूल ६० करोड ६१ लाख ५२ हजार सात सय कूल आम्दानी भएको राखेपले जनाएको छ। खर्च कटाएर जम्मा ६ करोड ८२ लाख ४८ हजार रुपैयाँ बचत भएको पनि राखेपले जनाएको छ।
पत्रकार सम्मेलनमा राखेपका सदस्य सचिव टंकलाल घिसिङले प्रतियोगिताअन्तर्गत विभिन्न शीर्षकको रकम रकमान्तर प्रक्रिया पूरा गर्न २०८० साल असार पहिलो हप्तासम्म लागेको र तत्पश्चात भुक्तानी हुँदा खर्चको एकीन विवरण तयार गरि सार्वजनिक गर्न समय लागेको बताए।
नवौं राष्ट्रिय खेलकुदमा ३४१४ जना पुरुष र २७१३ जना महिलासहित कुल ६१२७ जना खेलाडीले ३९७ स्वर्ण, ३९७ रजत र ५५३ कास्यसहित कूल १३४७ पदका लागि प्रतिस्पर्धा गरेका थिए। ११ टिमको सहभागिता रहेको नवौं राष्ट्रिय खेलकुदमा नेपाल आर्मीले प्रथम उपाधि प्राप्त गरेको थियो।
