: राष्ट्रिय खेलकुद परिषद् (राखेप)मा कार्यरत कर्मचारीहरूले लामो समयदेखि रोकिएको बढुवा प्रक्रिया अगाडि नबढेको भन्दै संघर्षका कार्यक्रम घोषणा गरेका छन्।
बिहीबार काठमाडौंमा पत्रकार सम्मेलन गर्दै राष्ट्रिय खेलकुद परिषद् कर्मचारी संघले २७ वर्षदेखि कर्मचारीहरूको बढुवा नभएको भन्दै सम्बन्धित निकायमा जानकारी गराउँदा समेत कुनै सुनुवाइ नभएको भन्दै संघर्षका कार्यक्रम घोषणा गरेका हुन्।
उनीहरूले साउन २६ गते उपत्यकामा रहेका सबै कर्मचारीको भेला गराई कोणसभा गर्ने, साउन २८ देखि ३० गतेसम्म कालो पट्टी बाँधेर काम गर्ने, साउन ३१ गते कालो पट्टी बाधेर १ घण्टा र साउन ३२ र भाद्र १ गते दुई घण्टा पेन डाउन गर्ने जनाएका छन्।
शान्तिपूर्ण संघर्षकाबीच आफूहरूको माग पूरा नभए अर्को चरणको आन्दोलनको घोषणा गर्ने संघकी अध्यक्ष सरस्वती केसीले बताइन्।
उनले राखेपको ११६ औं बोर्ड बैठकको निर्णय अनुसार बढुवा प्रक्रिया अगाडि बढाइए पनि सरोकारवाला निकायले चासो व्यक्त नगरेको बताइन्। उनले खेलकुद मन्त्रालयबाट नै बढुवा प्रक्रिया रोकिएको जिकिर गरिन्।
उनले कर्मचारीहरूको बढुवा रोक्दा एसियन गेमको तयारी तथा प्रशिक्षण समेत रोकिन सक्ने बताइन्।
