वासिङटन डिसी : अमेरिकामा हवाईको माउइ टापुमा लागेको डढेलोका कारण मृत्यु हुनेको सङ्ख्या ५३ पुगेको छ। साथै उक्त आगलागीमा दर्जनौँ मानिस घाइते भएका छन्।
प्रशान्त महासागर नजिकै बज्रिएको आँधीबाट उत्पन्न तीव्र हावाहुरीका कारण मङ्गलबारदेखि सुरु भएको डढेलो द्रुत गतिमा फैलिएको हो। त्यहाँका हजारौँ सर्वसाधारणलाई अस्थायी आश्रयस्थलमा स्थानान्तरण गरिएको छ।
माउइमा विद्युतीय पोलहरू ढल्दा ११,००० मानिस बत्तीबिना बसिरहेका छन्।
हवाईका गभर्नर जोस ग्रीनले उक्त राज्यमा 'धेरै वर्षपछि यस्तो मानवीय क्षति' भएको बताएका छन्। उनका अनुसार त्यहाँका १,७०० भन्दा बढी भवनहरू ध्वस्त भएका छन् भने ऐतिहासिक शहर लाहैनाको ८० प्रतिशत भाग पूर्ण रूपमा प्रभावित भएको छ।
ग्रीनले सिएनएनसँगको कुराकानीमा हालको परिस्थितिबारे भने, 'सबैले यसलाई लाहैनामा बम प्रहार गरेको जस्तो घटना भएको बताउँनेछन्। यसमा कुनै शङ्का छैन।'
मृतकको सङ्ख्या बढ्न सक्ने चेतावनी
उनले सन् १९६० मा आएको सुनामीमा ६१ जनाको मृत्यु भएको प्रसङ्ग उल्लेख गर्दै डढेलोका कारण मृत्यु हुनेको सङ्ख्या त्योभन्दा बढी हुनसक्ने चेतावनी दिएका छन्।
अमेरिकी राष्ट्रपति जो बाइडनले उक्त टापुमा लागेको डढेलोलाई 'ठूलो विपद् घोषणा' गरेका छन्। माउइ नजिकैको बिग आइल्यान्डको थुप्रै भेगहरूमा पनि डढेलो लागिरहेको बताइएको छ।
प्रहरी प्रमुखका अनुसार यकिन तथ्याङ्क नभए पनि करिब १००० मानिसहरू अझै बेपत्ता छन्। अधिकारीहरूले त्यहाँ हराएका मानिसहरूको खोजी र उद्धार कार्य जारी राखेका छन्।
त्यहाँ आवासीय भवनहरू खाली गरिनुका साथै सडक अवरुद्ध पारिएको छ। हजारौँ विस्थापितहरूका लागि अस्थायी आश्रयस्थल स्थापना गरिएको अधिकारीहरूको भनाई छ।
भौतिक तथा मानवीय क्षतिको आधारमा यो विनाशकारी ठहरिएको बीबीसीले जनाएको छ। घातक डढेलो फैलनुको कारणबारे अझै पनि अनुसन्धान भइरहेको छ।
यद्यपि आँधी र सुख्खा मौसमका कारण आगो तीव्र बनेको जनाइएको छ। माउइ टापुसहित हवाईको ठूलो भूभागमा भएको खडेरीका कारण पनि डढेलो लागेको हो।
यूएस ड्राउट मोनिटरका अनुसार राज्यको लगभग १४ प्रतिशत भाग गम्भीर वा मध्यम खडेरीमा परेका छन्। त्यस्तै हवाईको ८० प्रतिशत भाग असामान्य रूपमा सुख्खा भएको स्थानका रूपमा वर्गीकृत गरिएको छ। बीबीसी
