— अमेरिकाको पश्चिमी राज्य हवाईमा डढेलोमा परी मृत्यु हुनेको संख्या ८० पुगेको छ । अन्तर्राष्ट्रिय सञ्चारमाध्यमका अनुसार माउई टापुको पर्यटकीय सहर लाहैनामा तीव्र गतिमा फैलिएको डढेलोमा ठूलो मात्रामा मानवीय र भौतिक संरचनाहरूको क्षति भएको छ । हवाईका अधिकारीहरूले आगलागीको घटना र सुरक्षाका लागि भएका प्रयासको जाँच गर्ने घोषणा गरेका छन् ।
डढेलोको घटनापछि सयौं व्यक्तिहरू सम्पर्कविहीन भएकाले मर्नेहरूको संख्या अझै बढ्न सक्ने स्थानीय अधिकारीहरूले बताएका छन् । डढेलोमा परी थुप्रै व्यक्ति घाइते भएका छन् भने हजारौं परिवार विस्थापित भएका छन् । घटनापछि हवाई राज्यमा आपत्काल घोषणा गरिएको छ । माउई काउन्टी सरकारले डढेलो नियन्त्रणको प्रयास गरिएको जानकारी दिएको छ । यद्यपि, तीव्र हावा र सुख्खा अवस्थाले अग्नि नियन्त्रकलाई डढेलो नियन्त्रणमा लिन मुस्किल परेको बताइएको छ । यस्तै ११ हजारभन्दा बढीको हवाई उद्धार गरिएको पनि स्थानीय अधिकारीले जानकारी दिएका छन् ।
हवाई राज्यको इतिहासमै यो सबैभन्दा ठूलो प्राकृतिक विपत्ति हो । डढेलोले लाहैना सहरका एक हजारभन्दा बढी भवनमा क्षति पुर्याएको छ । यो सहरमा मात्रै वार्षिक २० लाख पर्यटकले भ्रमण गर्दै आएका थिए । राज्यका अधिकारीले शुक्रबार स्थानीयलाई आफ्नो आवासको क्षति हेर्न दिन अनुमति दिएका थिए । स्थानीयले आफ्नो घरहरूमा लुटपाट भएको दाबी गरे पनि स्थानीय प्रहरीले यसको पुष्टि गरेका छैनन् । स्थानीयले घटनाअघिको पूर्वजानकारीमा ढिलाइ भएकोप्रति पनि असन्तुष्टि जनाएका छन् ।
हवाईको माउई र बिग आइल्यान्डमा मंगलबारदेखि डढेलो लाग्न सुरु भएको थियो । डढेलो लाग्नुको कारण अझै पत्ता लाग्न सकेको छैन । तर, तीव्र हावा र सुक्खाका कारण डढेलो फैलिएको थियो । पीडितका लागि माउई ६ आश्रयस्थल तयार गरिएको छ भने स्थानीयलाई सहयोगका लागि चन्दा उठाउन थालिएको छ । यो टापु अमेजनका संस्थापक जेफ बेजोससहित थुप्रै धनाढ्य व्यक्तिहरूको घर भएको क्षेत्र पनि हो । बेजोसले आफ्ना सहकर्मीसँग मिलेर १ सय मिलियन अमेरिकी डलर सहयोग दिने घोषणा गरेका छन् ।
