महिला विश्वकप फुटबलमा शनिबार इंग्ल्यान्डले कोलम्बियालाई पन्छाउन ठूलै घम्साघम्सी गर्नुपर्यो । तर, यो अस्ट्रेलिया र फ्रान्सबीचको खेलसँग जुन प्रदर्शन भयो त्यससँग तुलना नै गर्न नसकिने खालको थियो ।
इंग्ल्यान्डले कोलम्बियालाई २–१ ले पन्छायो भने सहआयोजक अस्ट्रेलियाले फ्रान्समाथि पेनाल्टी शुटआउटमा सनसनीपूर्ण विजय हात पार्दै महिला विश्वकपको अन्तिम चारको यात्रा गरेको छ ।
इंग्ल्यान्ड र अस्ट्रेलिया नै बुधबार विश्वकप सेमिफाइनलमा भिड्नेछन् । अर्को सेमिफाइनल स्पेन र स्विडेनबीच मंगलबार हुने तय भइसकेको थियो । सरिना वेगमनको युरोपियन च्याम्पियन इंग्ल्यान्ड ७५ हजार दर्शकमध्ये बाक्लो संख्यामा उपस्थित कोलम्बियाली समर्थकमाझ सिड्नीमा लिसी सान्तोसको सनसनी गोलमा पछाडि परेको थियो ।
पहिलो पटक क्वाटरफाइनल खेलिरहेको कोलम्बियाका लागि ४४ औं मिनेटमा सान्तोषले यो अग्रता दिलाएकी थिइन् । तर, कोलम्बियाकी गोलरक्षक क्याटलिना पेरेजले बल नियन्त्रण गर्न नसकेको अवस्थामा इंग्ल्यान्डबाट लाउरेन हेम्पले पहिलो हाफको इन्ज्युरी समयमा बराबरी गोल फर्काइन् । दोस्रो हाफमा एलेसिया रुसोले गरेको आरामदायी गोलमा इंग्ल्यान्ड विजयी भएको हो ।
‘म एकदमै उत्साही छु, हामीले हाम्रो सपना जीवित राखेका छौं,’ रुसोले भनिन्, ‘उनीहरूसँग धेरै प्रतिभाशाली खेलाडी थिए, जसले जुनै बेला पनि दुःख दिन सक्थ्यो । अस्ट्रेलियासँगको खेल निकै रोमाञ्चक हुनेछ, यो भन्दा ठूलो के नै चाहिन्छ र ? खेलमा कोलम्बियाका धेरै समर्थक थिए, त्यसले हामीलाई आगामी खेलका लागि परीक्षण हुने अवसर दियो ।’
अस्ट्रेलियाले फ्रान्समाथि पेनाल्टी शुटआउटमा ७–६ को विजय हात पार्दै पहिलोपल्ट सेमिफाइनल स्थान पक्का गरेको हो । ब्रिसवेनमा १ सय २० मिनेटको खेलमा कुनै नतिजा ननिस्किएपछि पेनाल्टीबाट खेल छिनोफानो गर्नुपरेको थियो । १० औं पेनाल्टीमा अस्ट्रेलियाका कोर्टनी भाइनले आरामसँग निर्णायक गोल गरेपछि घरेलु दर्शक खुसीमा निकै उत्साही हुन पुग । त्यसभन्दा अघि विकी बेचोले फ्रान्सबाट गरेको १० औं पेनाल्टी प्रहार गुमाउन पुगेकी थिइन् ।
अस्ट्रेलियाका प्रशिक्षक टोनी गुस्ताभसनले यसलाई आफ्नो खेलजीवनको सबैभन्दा भावनात्मक दिनको रूपमा व्याख्या गरे । ५० हजार दर्शकमाझ अस्ट्रेलियाले आफ्ना सबैभन्दा ठूलो स्टार साम केरलाई बेन्चमै राखेको थियो । विश्वकप सुरु हुनुअघि घाइते भए पनि अहिले फिट भइसकेकी उनी दोस्रो हाफमा मैदान प्रवेश गरिन् र पेनाल्टीमा शान्त ढंगले गोल पनि गरिन् ।
