विराटनगर : जन्मदेखि नै मलद्वार नभएका शिशुको जटिल शल्यक्रिया भएको छ। भारत बिहार राज्यको फारविसगंजका ९ महिने शिशुको पारस अस्पताल विराटनगरमा सफल शल्यक्रिया भएको हो।
अस्पतालका निर्देशक डा. सफिर रहमानको नेतृत्वको चिकित्सकको टोलीले करिब ५ घण्टा लगाएर शल्यक्रिया गरेर मलद्वार बनाएको अस्पतालका प्रमुख कार्यकारी अधिकृत हेमनारायण मेहताले जानकारी दिए । अस्पतालमा बुधबार पत्रकार सम्मेलनको आयोजना गरेर अस्पतालले सफल शल्यक्रिया गरेर डिस्चार्ज गरेको जानकारी दिए ।
फारबिसगंजका मो ईस्तीकारको दोस्रो सन्तानको रुपमा जन्मेको छोराको मलद्वार नहुँदा देब्रे तर्फको ठूलो आन्द्रामा प्वाल बनाएर दिसा निकाल्ने व्यवस्था गरिएको थियो। डा. सफिर रहमामनका अनुसार ठूलो आन्द्रा बाहिर निस्केका बेला शिशुलाई उपचारका लागि अस्पताल ल्याएको जानकारी दिए ।
बालकका परिवार आर्थिक अवस्था कमजोर भएकाले अस्पतालले सामान्य खर्चमा ठूलो शल्यक्रिया गरेर मलद्वार बनाएको बताए । पटनमा शल्यक्रिया गराउन जाँदा स्वास्थ्य चेकजाँचमा नै ५० हजार खर्च भएको र शल्यक्रिया गर्दा अझै धेरै रकम लाग्ने अस्पतालले जनाएपछि शिशुलाई घरमा नै राखिएको थियो ।
पारस अस्पतालमा कम खर्चमा जटिलभन्दा जटिल शल्यक्रिया गर्ने गरेको थाहा पाएर अस्पताल आएको र चिकित्सकले सामान्य खर्चमा शल्यक्रिया गरी छोराको ज्यान जोगाएको इस्तीकारले बताए । चिकित्सकले औषधि र वेड समेत निशुल्क गरिदिएको उनले बताए ।
चिकित्सक रहमानले रेकटल मालफामेसन भएका शिशुलाई शल्यक्रिया गरेर एनो प्लाष्टिक बनाएको बताए । बच्चा पूर्णरुपमा स्वस्थ्य रहेकाले डिस्चार्ज गरेको उनले बताए । उनका अनुसार एक महिनामा बच्चाले मलद्वारबाट नै सामान्य रुपमा दिसा गर्ने दावी गरे ।
सो अस्पताले विपन्न तथा गरिबलाई निशुल्क उपचार गर्न गिरिजाप्रसाद कोईराला फाउन्डेसन कोशी प्रदेशसँग सम्झौता गरेर विपन्न तथा गरिबको निशुल्क उपचार गर्दै आएको छ ।
